April 9, 2024; Maxi Cab pathum (3) chuan registration number inang - MZ-01J-3150 vek an hmang tih hriat a nih avangin Aizawl Traffic Police te chuan heng lirthei reg. no inang hmante hi chhuichhuak in tunah hrên sak mek an ni.

He thil diklo chungchang hi hriat a nih hnuah a inhnamhnawih te rang taka chhui nghal a ni a. A tul anga dan anga hmalak a nih theihna'n Aizawl Police Station-ah FIR thehluh tum a ni.

Aizawl traffic police chuan thuchhuah siamin, Lirthei lei chhâwn tum te pawhin tul lova sum kan sen thlawn mai loh nan documents a felfai leh felfai loh te, rûk a nih leh nih loh te hriatchian tum thin tur te, lirthei chetsualna a lo thlen thulha harsatna kan tawh loh nan hming thlak thuai thin turin an ngen thar leh a ni.

Dan kalha lirthei registration number inang emaw felhlel kan hria a nih chuan a tul anga buaipui zui a nih theih nen Traffic Control Room No.0389-2313061/9365553559 ah hriattir thin turin mipui an ngen bawk.