ZALEN, Mar. 07, 2025: Thla liam ta chhungin Mizoramah lirthei 2,191 hralh chhuah a ni a, nikum February aiin 786 (26.40%)-in a tlem a, January, 2025 nen khaikhinin 212-in a tla hniam bawk.

Lirthei zuartute chuan tun kum eng emaw zat chhunga hun khirh lai ber niin an sawi a; thenkhat chuan, “Mizoramah sum leng vel a tlem a, sumdawng dangte ang bawkin lirthei zuartute chu a tuartu zingah kan tel a ni,” an ti.

Federation of Automobile Dealers Associations (FADA) chuan February, 2025 chhungin India ram pumah lirthei 18,99,196 hralh chhuah a ni tih an tar lang a, kum kal ta February nen khaikhinin -7.19%-in a tla hniam a, January 2025-ah 22,91,621 hralh chhuah a ni thung.

FADA Mizoram Chairman Dr Franklin Lalrinngheta chuan, “India ram pumah pawh thla hmasaa lirthei hralh chhuah a tla hniam na a, Mizoramah a kiam nasa a, a bikin three-wheeler leh mi mal car hralh chhuah a tlem leh zual hle,” a ti.

Mizoramah thla hmasa chhunga lirthei 2,191 hralh chhuah zingah two-wheeler tam berin 1,678 a ni a, mi mal car 317 leh sumdawnna lirthei 187 a tel bawk a. January, 2025 khan a vaiin Mizoram dealer-ten 2,403 an hralh a; two-wheeler 1,762, mi mal car 443 leh sumdawnna lirthei 196 hralh chhuakin thla hmasaah hralh chhuah a tlem zawk vek a ni.

Nikum nena khaikhinin nasa taka a tlak hniam bakah kum 2025-ah thla hnih hman zawh tawh a ni a, a kiam zawngin thil a kal bawk.

India ram pumah January khan lirthei hralh a pun laiin February-ah a tla hniam leh a, chutih laiin ngaihven ber ni reng thin mi mal car zuartute zingah Maruti Suzuki chu hralh tam ber a ni zui zel a, Mahindra-in pahnihna luah chhovin sawi a hlawh a, January khan palinaah a awm a ni.

Mizoramah pawh lirthei ke li nei zuartute zingah Maruti Suzuki dealer GIG Motors-in a hralh tam ber a, Mahindra full range dealer Mana Motors-in a dawt. LBS Suzuki chu ke hnih nei lirthei hralh tam ber ni ve thungin Yamaha Thansanga and Sons-in a dawt a, sumdawnna lirthei lian zuartute zingah Tata Motors dealer Zothan Autoworks-in a hralh tam ber a ni.

Lirthei zuartute hi Mizorama chhiah chhung lut hnem zinga mi an ni a, an tlak hniam rualin Mizoram GST pawh a kiam ve mek a. January khan Mizoramin GST atangin Rs. vaibelchhe 49 a khawn chhuah laiin February-ah a tla hniam a, vaibelchhe 42 lutin India hmarchhak state zinga hmu tlem ber a ni.