September 3, 2023; Aizawl Traffic police-te chuan kumin chhungin lirtheia mudguard vuah lo 400 chuang an man tawh a. Mudguard vuah lo te chu dan angin, a tlem berah Rs. 2,000 chawitir an ni.

Traffic SP Stephen Lalrinawma chuan, lirtheia mudguard vuah lote chu vuah vek turin tunhnai khan a hriattir a, thupek zawm lote chu The Motor Vehicle (Amendment) Act, 2019 Section 179 hnuaiah hrem theih an nih thu a tarlang.

Traffic SP chuan mipui hriattirna chhuahin, frr ruahtui tlak lai a nih angin ruahsur lai leh a hnu lamah kawngpui a huh thin tih a tarlang a, "Kawngpui a huh hian two wheeler, a bik takin motorcycle (bike) khalhtute zingah an lirthei ke vir atanga tui/chirh per lo dangtu mudguard thlawnte hian an hnunga mite tui, bawlhhlawh leh chirh an tihper thin.

MV Act, 1988 Section 52 chuan phalna nei loa lirthei nihphung tihdanglam a khap tlat a, Mizoram Motor Vehicles Rules, 1995 Section 170-in a sawi angin lirtheiah mudguard vuah tur a ni," tiin, dan angin a tlem berah Rs. 2,000 chawi tir theih an nih bakah an bawhchhe nawn leh a nih chuan a let an chawi a ngai tawh niin a tarlang.

Traffic SP hian lirthei, a bik takin bike neitu leh hmangtute chu mudguard thlawna lirthei khalhin mi dang tan harsatna a thlen thei tih hria a, mudguard vuah turin a hriattir a, mudguard thlawn tawhte pawh vuah vek turin a hriattir bawk