Lirthei in naupang kum 4 mi tai hlum

ZALEN May 6, 2025; Nimin tlai dar 4 vel khan Salachhuah lam atanga motor thil dah haw lam in, hmeichhe naupang Lallawmkimi (4) D/o H.Mankima, Tipa D-I chu an In kawtah a tai a, Tipa Damdawiin panpui anih hnuin a hliam tuar loin a thi.

Tipa Express in a tarlan danin Hmeichhe naupang Lallawmkimi hi an In kawt kawngpui chhak lama a u te awmna lama a kal tur chu chhuk zal deuh a motor 407, MZ-07- 5167, C. Lalzawnkima (37) Lawngtlai Electric veng nia insawi khalh, chak taka tlan chuan hmu thut in kawng chhak lama motor a herh kawina lamah motor body hnung lam chuan a hmaiah hemin a tlu a, damdawi in panpuiin, Lawngtlai lama refer a ni a, mahse Lawngtlai an pan hmain a boral a ni.

Lallawmkimi hi H. Mankima te fanu neih chhun, an fa naupang ber niin, kumin a school, KG kal tan chauh a ni a. Motor neitu hi hmeichhe naupang pu te lam hnai a ni a. Hmeichhe naupang ruang hi nizan ah tlaivarpui niin vawiin ah vuiliam a ni ang.

He thil thleng avang hian MTP Sub Hqrs Tipa kaihhruaina hnuaiah Tipa 'V' All NGO emergency meeting neih a ni a. Meeting chuan May ni 5, 2025 zan dar 10 atangin tiam chin awm lovin Lirthei bungraw phur, Tipa khaw chhungah tlan tlang phal ani lo tih an tarlang a, rui chunga motor khalh lo tur leh Tipa khaw chhung leh dai bakah National Highway-54 ah te chak taka tlan tlang lo turin an ti bawk.

#ZalenNews