Manchester United chuan tun summer chhunga an player lakluh pathumna turin Ajax lam a khel mek, Argentina defender Lisandro Martinez lalut turin pound maktaduai 45 in inremna an nei. 

Kum 24 mi Martinez  hi United manager Erik ten Hag nen hian tun hma lamin an lo thawk ho tawh thin a, 2019 khan Ajax-ah a la lut a, kum thum hnuah United lamah an thawk dun leh dawn ta a ni.  

Dutch club hian an player duhlai Martinez chu hralh an ui hle a, mahse United chief executive Richard Arnold leh football director John Murtough te hian kar hmasa khan va dawrin Amsterdam lamah a thuphungin inremna an va siampui tawh a ni. 

Martinez hi central defender niin veilam pangah a awm thin a ni. Ten Hag-a’n Melbourne-ah khan captain Harry Maguire  chu veilama khelh tir lovin ding lamah a khelh tir a, chuvangin Maguire a awmna thin veilama awm turin Martinez hi a duh a nih hmel. 

Martinez hian visa te a buaipui fel hnuah medical nei turin Manchester lam hi a pan ang.