Aizawl : LLTF volunteer Covid-19 kai nei khua leh veng te chuan an member te inenkawlna senso chungchangah sawrkar lam atangin thu lawmawm hriat an la neih loh thu an sawi. Hetih lai hian Chaltlang Lily Veng chuan CM Relief Fund atangin puihna hmuh an beisei thu ZALEN an hrilh bawk a.

ZALEN in veng leh khaw hrang hrang a biak chinah a tu a te mahin sawrkar atanga puihna an la dawn loh thu an sawi vek a. Ei leh bar chungchangah pawh LLTF leh VLTF te hmalaknain nitin mamawh tur te an pe thin hlawm a, veng thenkhat chuan hetiang a pek ngai an la neih rih loh thu an sawi hlawm. Veng leh khua te hian an bialtu MLA te’n an ngaihsak hle tih an sawi vek hlawm a, chutih rualin sawrkar lam atangin puihna an la dawn loh thu an sawi vek a ni.

Tun dinhmuna inkharkhip rei tawh ber Chaltlang Lily Veng chuan mimal atang bakin sum dawn an la nei lo tih an sawi a, veng chhung mi inphalte thawkhawm atangin a mamawh te tan thilpek an pe mai thin. Anni hi August 12,2020 atanga lockdown tan kha an ni a, fihlim khata an inngaih hnuah partial lockdown an kalpui zawk a, mahse, sawrkar lamin August 26,2020 khan containment area-ah a puang leh a, hei hi kalpui zel a la ni. An veng atang hian mi 18 positive hmuh niin 2 chu chhuah an ni tawh.

Zirtawpni khan sawrkar tirhin survey team te chuan in zawng zawng an luh chhuah leh a, anni lam hi chuan tun dinhmunah chuan him riha an inngaih thu an branch YMA president V. Malsawmtluanga chuan ZALEN a hrilh a. Chaltlang Lily veng hian sawrkarah CM Relief atanga puihna an dil a, an dilna hi a hlawhtling dawn nia an hriat thu an sawi bawk.

Local Level Task Force volunteer zinga kai an neih avanga kharkhip Ramhlun South chuan sawrkar lamin volunteer leh frontline worker positive te senso chu an tum vek tur thu sawi mah se, tun thlengin sawrkar lam atangin aw ka an la nei lo tih an sawi a, an volunteer te senso erawh an lo tum sak mai turah an ngai thung. Zirtawpni khan contact tracing neiin sample laksak an nei nual a ni.

Containment area a puan Melriat YMA hruaitu Marcelus Laltanpuia chuan chin hriat a har em avangin doctor te chawh angin mimal leh VLTF sum damdawi pawh a khaw pumin an lo ei lawk hial a thu a sawi a. Heng damdawi te hi mimal pawisa leh te sum atanga lei a ni a, an bialtu MLA F. Lalnunmawia chuan an senso hi a tum sak dawn niin ZALEN a hrilh.

Sipai rawn haw atanga inkaidarh chho nia ngaih Melriat ah hian mi 31 an test atanga 14 an hmuhchhuah hnuah hmuhchhuah belh an la neih lo a, rinhlelh an neih an test leh te chu an negative a, chutih rual chuan an ngaih erawh a la that theih loh thu an sawi a, khawtlangah ei leh barah harsatna nei an la awm lo niin an sawi bawk.

Aizawl Venglai-ah pawh LLTF lamah kai an awm avangin veng chhung lockdown a ni a, an LLTF chairman G.S. Munga chuan LLTF kai te chungchangah sawrkar lam atanga thu dawn an la nei lo tih ZALEN a hrilh bawk a. An venga kai te hian khawi atangin nge an kai chhawn tih an hriat theih rih loh thu a sawi a, Ramhlun lam positive contact nei, lo chhawrtu pakhatin a kai tih sawiin, a kaitu nia an hriat lah hi a negative bawk si avangin hriatthiam harsa an tih thu a sawi a, an volunteer te kai dan pawh chiang taka sawi tur an neih loh thu a sawi bawk.

Kar hnih dawn inkharkhip tawh Sawleng leh Sakawrdai te chuan an veng chhungah puih ngai an nei chho tan tawh tih an sawi a. Veng chhunga mi inphal te thawhkhawm hmangin nitin mamawh chu heng mi te hi an pe mai thin tih an sawi a. A tira positive an neih bak erawh an neih belh lem lo tih an sawi lang tel bawk. An inkharkhip rualin an khuaah hian motor-a tlan tlang erawh an phal. Hetihlai hian Tlungvel, Thingsulthliah, Thingsul Tlangnuam leh Phulmawi te chu lockdown an ni mek a, anni hi Melriat lama arsa lei atanga inkaichhawng nia ngaih an ni.

Tun hnai khan Melriat chu sawrkarin containment zone -ah puan a ni a, a hma hian Chaltlang Lily Veng leh Ramhlun South te chu containment area-ah a lo puang tawh bawk. Anni bakah hian Darlawn, Sakawrdai leh Sawleng te chu hun rei tak atanga khan lockdown puan a lo ni tawh bawk a, heng veng te mai bakah hian Aizawl khaw chhunga veng engemaw zat chu lockdown a puan a ni bawk a, heng vengah te hian inthlan pawh huaihawt a ni lo a, Tlungvel, Thingsulthliah leh Thingsul Tlangnuam te chu lockdown an ni bawk.