Aizawl: Inkharkhipna hnuaia ni nga kan awm hnuah Aizawl Traffic Police ten ni li chhunga dan bawhchhia sum an chawi tir chu Rs 1,25,300 a tling hman. Traffic Police lo chuan Local Level Task Force ten chhuah phalna an pek zingah license nei lo lirthei khalh an tam lutuk chu an buaina ber a nih thu an sawi.

Traffic Police te hian dan bawhhchia an chhinchhiah dan hi chi hniha kalpuiin, Covid-19 inkaihhruaina dan bawhchhia  leh traffic dan bawhchhe hrim hrim angin case hi an kalpui. Heng dan bawhchhia te hi an manna hmuhnah a tam ber chu chawi tir nghal an ni a, an dan bawhchhiat dan a zirin office lama tih fel sak ngai engemaw zat an awm bawk.

Traffic dan bawhchhia kan tihah hian a tam ber chu, chhuah phalna permit nei si, driving license nei lo te an ni hlawm a, traffic rules hrim hrim bawhchhia man tur an awm reng bawk a, an buaina ber erawh, license nei lo, sum chawi tur nei mai bawk si lo te an nih thu Traffic Police lam chuan ZALEN an hrilh. LLTF lam pawhin license nei lo te traffic pass pe tawh lo thei se an duh thu an sawi bawk. Dan bawhchhia an man te hi mi 375 niin, mi 227 te chuan an chawi tur ang an chawi tawh a, an sum chawi tlingkhawm hi Rs. 69400 a ni.

Covid-19 hnuaia dan bawhchhia te hi mask vuah lo, chil chhak lohna tura chhak leh social distancing zawm lo kan tih ang chi te kha an ni thung. He dan bawhchhia an man mi 235 te sum chawi tlingkhawm hi Zirtawpni thleng khan Rs 55900 a ni a, Inrinni lam report he thu buatsaih lai thleng hian a la hriat hman loh.