Aizawl: Mizoram State Election Commission (SEC) Chairman Laima Chozah chuan Lunglei Municipal Council (LMC) inthlan buatsaih hun tur a la sawi theih loh tih a sawi a. Hetihlai hian Mizoram sawrkar chuan LMC dinna turin budget-ah Rs. Nuai 80 a lo dah tawh.

ZALEN zawhna chhangin SEC chairman chuan LMC chungchangah inbuatsaihna a kal mek zel a, tun dinhmunah inthlan buatsaih theih hun tur a la hriat loh thu a sawi.

SEC chuan July 4, 2022 khan hriattirna tichhuakin LMC inthlan hmasa ber lo awm tur atanga hman turin seat awm zat, seat 11-a seat li (hmun thuma thena hmun khat) chu hmeichhiate chauhin an chuh theih atan a hauh a. Hmeichhiate tana hauh bik awmna ward-te chu thumvawr hmanga zawn thin a ni dawn a. Hmeichhe ward hi thlak kual thin a ni dawn a ni.

Hetihlai hian kum 2022-23 budget-ah sawrkar chuan LMC bultanna atan Rs. Nuai 80 a dah a, a tul anga fund allocation tihbelh zel theiha ruahman a ni.

November 21, 2021-a chief minister hoa Council of Minister thukhawm chuan LMC din an remti a, ruahman dan chuan ward 11 a awm dawn a ni.