Aizawl : Vawiin September 8, 2022 khan Aizawl District Congress Committee (ADCC) huaihawtin Lal Thanhawla Auditorium-ah Block leh Unit hruaitu te tan Aizawl City Block Joint Conference neih a ni a. He huna thusawitu Lalsawta chuan vote lei tumtute an lokal hunah chuan - Lo ti zak rawh u! Lo tibeidawng rawh u!, a ti.

He hunah hian MPCC President Lalsawta, chuan thu sawiin, "Kan duhthusam pha chiah lo mah ila, LC leh VC Bye Election Results a tha thawkhat a, Congress Party insiamtha mek hi mipuiin min thlir a, min ring chho tan niin kan hria a, kan lawm em em a ni. Hlawhtlingte kan lawmpui a, hlawhtling ta lo te pawh beiseina thar nena tang leh zual turin kan fuih a ni," a ti. "Pathianin mihring min siam chhan hi Lal Isua lalna ram (Kingdom) din tura min duh vang a ni. Ram hmasawnna kan ngaihtuah hian Environment humhalh chunga Development thawh leh Mihring chhungril Nun tha (Morality) humhalh te a ni. Mihring rilru thatna awm hi thang lian turin Sawrkar tha chuan an chawm nung thin," a ti bawk.

Lalsawta chuan vote lei chingte laka inthiarfihlim tura kalkhawmte fuihin, "Nakum Inthlan thlirin i chhiah pek tlingkhawm, dik lo taka an lo chheprelh hmang khan nangmah lei tuma thlemna i tawk dawn. I vote lei tumtu hian lei theih thil ang lekah a ngai zawk che a ni! Nangmah a hmangaih vang che ni lovin amah a inhmangaih a, a lo hausak belh theih nan sum a hmang a ni. Lei tumtute an lokal hunah chuan - Lo tizak rawh u! Lo tibeidawng rawh u!," a ti. 

Congress-in sorkarna a siam huna a tih turte sawiin, "Kan ram siam tur hian thil tam tak tih tur kan nei, kan sawi seng lovang. Kan sawrkar a nih chuan ram rorelna dik leh rin tlak nei tur te, chhungkaw harsa zawk, mahni a dingchhuak zo lo te tanpui nana tang puihna tur te, mamawh intawm siam te, mimal harsatna sutkianna tur te kan kalpui dawn. Tan la thei lo harsa lehzualte pawh Congress-in kan hlamchhiah dawn lo, an pualin ruahmanna kan siam dawn. Mizoram hi taima leh thawkrimte dinchhuahna ramah kan siam dawn a ni," a ti.

Lalsawta chuan Congress Party hruaitute chu Pathian duh dana nung tura chahin, "Pathian laka kan tlin lohzia leh ngaihdam ngai reng kan nih hi inhre reng ila, engmah chhuan tur nei lo kan nih angin Congress mipui hian kan sualte kan sim a, Pathian lam kan hawi a, Pathian kan auh chuan Ani chuan min lo ngaidam ang a, min tidam leh ang. Kan tum ber hi Pathian duh dan a nih phawt chuan Pathianin min tanpui ngei beisei ila. Pathian tanpui tlak nih i tum ang u," a ti bawk.