Aizawl August 15, 2024 : Independence Day lawmna a thu a sawinaah Chief Minister Lalduhoma chuan Mizoram Ceiling on Government Guarantees Act 2011 chu siam danglam a ni a, he scheme hnuaiah hian loan cheng nuai 50 chin la duhtute tan sawrkar chu guarantor-ah a tan tur thu a sawi.

Chief Minister chuanMSME hmalakna lian tak MSME Elevate Mizoram scheme thar kan tlangzarh tawh a, bultanna tur sum puk mamawhtuten awlsam zawka an puk theih nan Mizoram Credit Guarantee Scheme kan duang fel a. Bana Kaih policy nena inhne rem turin Mizoram Ceiling on Government Guarantees Act 2011 pawh kan siam danglam ang. Loan Cheng nuai 50 chin puk tur te tan sawrkar chu guarantor-ah a tang dawn a, interest pawh sawrkarin a tumsak dawn a ti. Hetiang Scheme hi India ramah nei awmchhun niin an inhriat thu Lalduhoma hian a sawi bawk.

Bul tanna tur a sum puk dan awlsam zawk a awm theih nan Mizoram Credit Guarantee Scheme (MzCGS) chu duan fel tawh a ni tiin hemi atana thawhpui turin Credit Guarantee Trust of Micro and Small Enterprise (CGTMSE) te nen insiamremna neih thuai tum a ni. He scheme pahnih te hi Bana kaih Programme nen a remchan theihna apiangah kalkawptir tum a ni, a ti bawk.