Aizawl: Mizorama Bank hrang hrang ten loan an pekchhuah tlem chhan chu a puktu industry leh factory lian a awm loh vang niin Bank lam chuan an sawi a. Hetih lai hian loan rulh lam chu duhthusam ni lo mah se, a tha thawkhat niin an sawi. Mizoram bank awm zinga Bank in sum deposit a dawn atanga loan pek chhuah (CD ratio nei tha ber chu Punjab National Bank (186.59%) niin nei chhe ber chu Yes Bank (5.84%) a ni thung a.

Zalen in Bank thawktute hnen atanga thu a dawn danin mi thenkhatin Mizorama Bank te chu hmundang aia loan pechhuak tlem anga an sawi chu thil an hriatfiah tawk chiah loh vang nia sawiin, state dangah chuan industry leh factory lian ten loan tam tak tak an puk a, Mizoramah erawh chuan thil siamchhuahna tur a loan lian lak a awm ve loh avangin loan pek-chhuah hi a tlem lo thei lo niin an sawi a. Mizorama loan pekchhuah te chu sawrkar hnathawk bakah dawrkar leh mi thenkhat ten an puk te chauh anih avangin credit-deposit ratio chu a hniam lo thei lo niin an sawi.

State Bank of India thawktu te chuan loan pek kawngah harsatna a awm lo tih sawiin, "Bank ten loan pechhuak tha duh lo anga an sawi hi a dik lo a, loan dilna a dik a, an scale in a phak phawt chuan pek duh loh a awm lo a ni," an ti. Mizoram chu loan rulh kawngah state dang te aiin a tichhe bik lo tih sawiin, "Loan rul tha lo tawk chu awm mah se, a chhe lutuk lem lo a, state dang te ngaih-tuahin a chhiat bikna a awm lem lo a ni," an ti.

Credit-Deposit ratio chhiat chungchangah Bank hrang hrang te chu loan pechhuak tam turin an nawr reng nia sawiin loan lian la an awm loh avangin CD ratio hi a sang thei lo niin an sawi bawk. Zalen thudawn danin Mizorama bank thenkhat chuan deposit an dawn aia tam loan an pechhuak a, hei hi a him lo thei niin Bankers pakhat chuan an sawi a. Bank thenkhat CD ratio san chhan chu deposit an dawn tlem vang niin a sawi bawk.

Mizorama branch ngah ber Mizoram Rural Bank hotu te chuan an bank CD Ratio chu 44% a ni tih an sawi a, CD ratio a hniam chhan hi deposit a tam vang niin an sawi. MRB hotu te chuan, "Kum kalta khan kan deposit a thang nasa hle a, nikum chhung ringawtin deposit hi vaibelchhe 880 kan nei tling a. Hemi mil tura loan nghal zung zung a theih loh avangin kan CD ratio hi a hniam angin a lang ta mai a ni," an ti a. CD Ratio chu hnathawh tarlanna atana tehfungah hman ber tur a ni lo tih sawi bawkin, "Loan pek chhuah hrim hrimah hi chuan Mizoram Bank zingah kan sang fal nalh a, loan pek kawngah pawh a tling leh tlak ah chuan harsatna a awm lo a ni," an ti bawk.

Mizoram Co-operative Apex Bank Ltd. hotute chuan an CD Ratio chu 63.9% a ni tih sawiin loan rulh kawngah harsatna awm bawk mah se, a tlangpuiin loan la tu ten an rul tha niin Zalen an hrilh bawk.