Hripui leng then dan 4
1st Stage- Ram pawn atangin putluh a ni
2nd Stage- Midangah a kai darh a, (local transmission) a kaite la chhui theih zel an ni.
3rd Stage - Vantlangah a darh a, (community transmission) a kai darh te chhui theih a ni tawh lo. kut silfai te lo chhunzawm zel ang che.
4th Stage - Hri a darh zela, thi an pung, a tawp hun tur thlir thiam a har tawh.

Aizawl: Mizoram State Transport a bus conductor hnathawk, phai atanga lo haw phurtu zinga mi chu nimin zing khan covid 19 in a man tih hriatchhuah a ni a, Mizoram chu hripui leng stage 1 atangin stage 2 (local transmission- ram pawna atanga kai atanga midanga inkai) ah lutin community transmission erawh a la ni lo niin doctor te chuan an sawi. Damlo hi Aizawl Hospital (AH) ah a lo inentir avangin he damdawi in hi tiam chin awm loa khar a ni a, a chenna Mission Veng pawh tlawhpawh theih loh a inkharkhip nghal a ni bawk a, hetih lai hian a chhungte zinga buaipuitu pakhat chu RT-PCR ah a negative niin thudawn a ni bawk.

"Tuna damlo hi hripui rawn kaite atanga kai a nih hmel a, chhui theih a la ni a, local transmission niin a lang a, community transmission ah chuan hripui kaite an kaina chu rinzawn ngaihna a awm loa, chhui zui theih pawh a ni lo thin a, community transmission chu a la ni lo," tiin doctor pakhat chuan Zalen a hrilh a ni.

Damlo hi ni 8.06.2020 khan AH ah hian casualty ah a inentir a, in lamah haw lehin ni 10.10.2020-ah a kal leh a, damdawi inah hian minute 30 vel chauh awmin ZMC lamah Ambulance a phurh phei nghal a ni a, nimin zing khan hripui a kai tih hriatchhuah a ni ta a ni. Aizawl Hospital hotute chuan an fimkhur hle thu sawiin, "Tlawhpawh theih kan nih hrih loh bakah dinhmun hlauhawm lemloha awm nia kan hriat thlengin kan khung hrang nghal a, tunhnaia damdawi in rawn tlawh chhui chhuah (contact tracing) chu hnapui berah kan nei bawk a ni," tiin Zalen an hrilh.

Mission Veng Local Task Force chuan thu leh awm hma chu inkharkhip puangin dawr pakhat leh damlo inluahna building chu tlawhpawh theih lohin an khar hrih bawk a. Damlo chhungte'n an lo tlawhpawh tawh te chu chhui let mek niin an sawi bawk a ni.

Aizawl DC, Vanlalngaihsaka'n Zalen a hrilh danin Mizo lo haw thiartu sawkar bus driver leh conductor te chu R.Dengthuama Hall bul Government Aizawl College building tharah dahhran an ni a, hetah hian quarantine an ni a, hemi chhung hian RAT test vawi 2 a endik an ni bawk a ni. "Thiar tur an tam si a, bus hi kan indaih thei ngang lo a private bus kan zawng khawm bawk a, kan neih ang chhunin theih tawp kan chhuah a ni," tiin DC Aizawl chuan Zalen zawhna a chhang bawk a. Theihtawpa an fimkhur thu sawiin bus hmalam chin chu daidanna saranga pin a ni a, PPE nen hnathawk te pawh thuam an ni a, intawk lo turin an puahchaha, bus chu sanitize leh thin a nih thu a sawi bawk.