Aizawl: Health department chuan September 17, 2020 thlenga partial lockdown neih chhungin Covid-19 vei leh vei lo endik hna sample test a tam thei ang ber neih an tum a. Covid-19 hri kai chu tam viau tawh mah se, vantlangah a la darh chiah lo niin an hria.

Zalen-in Health Secretary H.Lalengmawia IAS a biakna ah Health Secretary chuan kar khat chhung partial lockdown (September 11-17,2020) chhungin sample a tam thei ang ber lakkhawm a, test an tum tih a sawi a. “Test hmanrua pawh nei daih turah kan inngai a, theih-tawp chhuah kan tum a ni,” a ti.

Covid 19 vei tam viau mahse vantlangah chuan a la darh chiah lo nia a hriat thu sawiin H.Lalengmawia chuan, "Community transmission hi la thleng chiah loah kan inngai a, hetih lai hian local transmission erawh a thlengah a ngaih theih a. Mi thenkhatten community transmission a thleng nia an sawi pawhin kan hnial lem lo a ni,” a ti bawk.

Covid-19 hri kai hmuh chhuah a tam zel avang leh sawrkar laipuiin December, 2020-ah chuan Mizorama hri vei chu mi 5,000 an tling thei nia an sawi avangin hri kaite enkawlna (dah hranna) hmun chung-changah harsatna an nei thei nia sawiin Health Secretary chuan, “Covid hri kaite enkawlna tur chung-changah hmunhma indaih loh palh kan hlau hle a, CCC tur hi kan zawng zel a. Tun dinhmunah chuan kan la buai hrih lo a, la buai thei kan nih avangin sawrkar chuan ngaihtuahna a hmang zel a. Durtlang-a BSUP hmun pawh enfiah kan tum a, helai hmun hi hman theih a nih chuan mi 1000 dawn an leng thei turah kan ngai a ni,” a ti.

Health Secretary chuan Covid enkawlna tur atan kohhran leh tlawmngai pawl te an penchhuak zel chu lawmawm a tih thu sawiin, “Tuikhuahtlang koh-hran leh YMA ten an hmunhmate hman an phal a, hetiang bawk hian Electric YMA pawhin an hmunhma te CCC atan hman an phal a. Hetiang zela an penchhuah chuan enkawlna hmun chungchangah hian harsatna tawk lo turah kan inngai a ni,” a ti bawk.

Task force chu hri an kai a nih chuan a thlawnin sawrkarin enkawlna a pe dawn nia sawiin H.Lalengmawia chuan, LLTF leh VLTF te hi mi tlem te an ni a, vanduaithlak taka hri an kai a nih chuan a thlawnin enkawl an ni dawn a. An hnuaia mite erawh chu an case azirin ngaihtuah an ni dawn a, an bialtu DC emaw, CMO emaw ten an chanchin an zirchiang ang a, chuta tang chuan sawrkarin thu tlukna a siam dawn a. An vaia a thlawna enkawl chu a hautak dawn a, sawrkar tan phurh zawh loh a awm thei dawn a ni,” a ti a. Covid enkawlna atana mi inpe (volunteer) te chu August thla atangin sawrkarin lawmman ‘honorarium’ pek a tum tawh niin Zalen a hrilh bawk.