Aizawl : Covid-19 avanga Mizoram puma Lockdown kalpui mek chu chhuanzawm a nih tur thu Chief Secretary Lalnunmawia Chuango, IAS chuan Zalen a hrilh a, Assam sawrkarin blockade a kalpui tur anga thuthang awm chungchang erawh an hriatpui loh thu a sawi.

Mizoramin Covid-19 hri leng avanga inkharkhipna kan hman mek Lockdown 4 hi vawiin hian a tawp dawn a, nimin khan MINECO-ah hemi chungchang hi an sawi ho a, Lockdown hi kalpui chhunzawm a nih tur thu Chief Secretary hian a sawi. Zalen palai in Lockdown hi kalpui chhunzawm a ni dawn em tih a zawhna chu Lalnunmawia Chuango, IAS hian, "Lockdown maw, chhunzawm dawn e," tiin a chhang.

Assam chhungah Covid-19 hri kai an pung chak hle a, heng hri rawn kailut te hi state dang atanga rawn lut te an nih deuh zel avangin Assam sawrkar chuan state dang atanga lut tur te laka fimkhur taka hmalak a nih theihna turin nasa zawka inkharkhip a tum niin thuthang a awm a, hemi chungchangah hian Chief Secretary chuan engmah an hriatpui loh thu leh inbiakna pawh an neih lem loh thu a sawi. Ei leh bar leh tuialhthei lamah Chief Secreatray chuan Mizoram dinhmun a that thu leh buaina tur a awm hranpa loh thu a sawi bawk.

Social media lamah Assam chuan June ni 2 atangin state dangte nen an inkalpawhna khar a tum niin thuthang a awm a, hemi chungchangah hian Zalen palai chuan Guwahati leh Silchar-a Mizoram sawrkar aiawhte a bia a, state ramri khar tur thu an hriat loh thu in an chhang. Guwahati a sawrkar aiawhte chuan, "Assam ah hian Covid 19 hri vei hi an pung chak hle a, heng ho hi state dang atanga lo haw khawm leh a kaihhnawih te an ni deuh zel a. Chuvang chuan Assam sawrkar hian state dang atanga haw tawh lo se a duh ni berin a lang a. Chutih laia state ramri khar tur leh mihring leh bungraw phurh khap tur anga sawi hi chu a diklo a. Order leh guidelines engmah a awm loh avangin thil chiang tak kan la hre bik lo a ni," an ti.

Nimin tlai khan social media ah Lailapur velah kawng an dang niawm in an sawi a, Zalen chuan Silchar Mizoram House a bepawp nghal a. Mizoram sawrkar aiawhte chuan chutiang engmah indan awm loh thu te, lockdown leh state dangte nena ramri khar tura thuthang pawh Silchar DC an zawh pawhin engmah an hriatloh thu in a lo chhang niin an sawi.