Aizawl: Covid 19 vanga inkharkhip neih anih hnuin Mizoram chhiah hmuh nasa takin a tlem a. Hetih lai hian Taxation department chuan kumina sawrkarin budget a tuk chu hmuh hram an beisei.

March 2020 khan Taxation department chuan chhiah hi Rs. 488,136,465.00 a hmu a, heng te hi GST atangin Rs. 4,840,676,173 te, Proffesional tax ah Rs. 171,496,736, Sales tax ah Rs. 1,171,854,475, Commodities & Services ah Rs. 113,374 leh Registration & License fee ah Rs. 595,280 te a ni. India rama lockdown kalpui tak tak anih hnu April thla ah Rs. 143,516,224 hmuh a ni a, May thla ah Rs. 460,875,729 hmuh a niin June thla ah Rs. 374,613,578 hmuh a ni leh a, kumin financial year thla 3 chhunga Taxation department in chhiah chi hrang hranga an sum hmuh belhkhawm chu Rs. 979,005,531.00 a ni. GST atanga sum hmuh hi thla tin a pung hret hret a, May thla bika chhiah hmuh a pun chhan hi IOC (Indian Oil Corporation) in tax an chhun vang nia thudawn a ni.

Zalen in Taxation department thawktu te hnen atanga thu a dawn danin ramdang (foreign) atanga cigaratte leh eitur chi hrang hrang a lo luh loh avangin leh India thilsiam hralh tam anih avangin chhiah hmuh hi a tlahniam lutuk lo niin an sawi a. Myanmar leh Bangladesh atanga bungrua a lo luh chuan dan anga chhiah lak a nih ve loh avangin tax hmuh tur anga beisei hmuh phak a ni thin lo niin an sawi a. Tunhnaia sawrkarin petrol leh diesel man a tihsan in chhiah hmuh a tihpun leh pun loh chungchangah quarterly return a la luh loh avangin sum hmuh dan a la sawi mai theih loh niin an sawi bawk.

Mizoram sawrkar chuan kumin 2020-2021 atan Taxation department sum hmuh tur target a siam chu Rs. 6,000,000,000 a ni a, target hi hmuh theih an beisei leh beisei loh chungchang zawhna chhangin Taxation department thawktu te chuan engemaw harsatna a thleng a nih loh chuan taget chu an hmuh theih mai an beisei tih an sawi a. "GST bikah chuan ngai kan awh chho leh tan mek niin kan hria a. Dan pangngaia bungrua hi a lo luh reng theih a, harsatna dang a awm loh chuan kan target hi kan tlin leh mai theih kan beisei a ni," an ti.