Aizawl: Mizoram Youth Commission chuan hun remchang hmasa berah lockdown vanga hna chan te leh thalai a duh apiang te tan training buatsaih an tum.

Zalen in Mizoram Youth Commission hotute hnen atanga thu a dawn danin covid 19 vanga hnathawk chhunzawm thei loa lo haw 'migrant worker' leh thalai te tan skill training nei turin ruahmanna an siam mek tih an sawi a. Mizoram Youth Commission Secretary Donny Lalruatsanga chuan, "Mizoram sawrkar hnuaia training neih theihna department te be kualin training na tur kan dap pui a, hrileng hi a ziaawm veleh hmalak kan tum" a ti.

"Bank hotute pawh meeting kan neihpui tawh a, training chhuak ten eizawnna bul an tan theihnan tanpui turin kan ngen a. Hei bakah hna nei te leh hna zawng te an inbiakpawhna tur 'job portal' buatsaih kan tum bawk a ni," a ti. MYC hotute chuan training chu sawrkar hna zawn-sakna tur ni lovin eizawnna kawng zawnsakna tur a ni tih an sawi bawk.

Covid 19 vanga hna chan, Mizoram Youth Commission hnena puih ngai in report chu 2632 an awm a. Tuna an hnena in report zinga a tam ber 70% vel hi casual worker niin spa, restaurant, security guard leh company a thawk te an ni hlawm.

Mizoram pawna hnathawk te hian thla khatah chawhrualin nuai 300 vel an hlawh nia hriat a ni.