MPS (Retd) leh Lok Sabha 2024 inthlan-a Congress MP candidate ni bawk Labiakzama ziak Kat leh Daifim chu May 31, 2024 zan hian tihchhuah a ni dawn, belchiang ve lawk ila.

Fahrah unau pahnih hi rethei takin a pu hovin an khawsa a, a u zawk chu Zama niin a nau zawk chu Mawia a ni. Chutianga an khawsak mek lai chuan anmahni enkawltu, an pu chuan a thihsan leh ta thut mai a, Zama te unau chu tleirawl mai an la ni. A u chuan Mawia chu fa ang maiin a enkawl zui a, eizawnna ngelnghet zawk siamsak tumin a rem rem a thawk a, inhlawh ve pawh phal lovin lehkha a zirtir thin. 

Mawia pawh chu zirna lamah a tluang chho hle a, a thawhrah ngeia hna hmuh tumin theihtawp a chhuah ve reng a, chutih mek lai chuan Zama chuan thawhpui thar a chhar a, mihausa leh thil ti thei tak a ni. Zama chuan a thawhpuipa chu a nau hna zawnpui turin a ngen a, a thawhpuipa chu Sorkar hotute lamah pawh alo tlatlum ngang mai. Kar lovah Mawia chu Police-ah an thun a, a ute ruahmanna erawh Mawia chuan a hre ve reng reng lo thung. 

Zama te sumdawnna chuan thuneitute mit a tikham tan a, Mawia erawh dik taka hnathawh duh mi a ni. An unau chuan nun kawng chhuk chho harsa takin paltlang dun mah se, hmalam beisei dan inpersan tak avangin an hmathlir a dang chho telh telh a, an kawng zawh inang lo tak avang chuan an dinhmun a inep lo thei si lo. Harsatna atanga amah leh a a nau khaichhuak tura a u beihna chuan chhia leh tha thliar hlei thei loin a siam a, hmangaihna dawngtu, a nau chuan kut kawl nen alo hmuah a ngai dawn em ni?

He film hi Lalbiakzama ziah niin ama'n a Direct nghal a ni. Bza hi film siam lama tui tak a ni a, kum 1980's vel atang khan lo tuipui tawhin, film puitling siam tumin hma pawh alo la tawh thin a, mahse, shooting an neih laiin eizawnna avangin a chhunzawm theih lo a, a eizawnna atanga a pension hlim atangin film siam lamah a bur leh nghal chat a ni. Hmun hrang hrangah Police Officer niin a awm kual a, a hna atanga a tawnhriat chi hrang hrang lakhawmin thawnthu tha tak tak a ziak a, he movie pawh hi thil thleng tak tak behchhana siam 'Inspired by true events' kan tih ang chi kha a ni.

Jeremy Lalngilneia nen a tir phat atangin an thawkdun a, ani hi thla latu (Director of Photography) niin a video hi a edit nghal bawk a ni. Christian film Mizovin kan neih that zinga thawhhlawk tak niin Dinthar Kohhran leh KTP film siam Nun Krista (2011) leh Lal Isua Nen (2013) tiha a thla latu kha a ni a, kum 2022 kum tawpa release 'The Lottery' ah khan Director hna a lo chelh tawh bawk a ni.

Kum 2023 April thla khan a changtute an zawng tan a, an inhmuhkim hnuah thla khat aia tam mah film script zirpuina (conditioning) neiin hun an hmang a. June thlatawp atangin shooting an tan a ni. Midangin thla 3-4 vela an zawhfel laiin anni hi chuan kum 1 chuang buaipuiin siamthat ngai laite an siamtha chho mawlh mawlh a, May 31, 2024 zan hian release a ni dawn ta. Zonet Empai App-ah (Playstore leh AppStore-ah a app hi download mai tur a ni) he Movie hi a lei theih dawn a ni.