ZALEN June 19, 2025; Mizoram chu India rama corruption tlemna ber pahnihna a ni. 

Mizoram Lokayukta buatsaih I&PR Conference Hall Kolasib-a Lokayukta Awareness Programe nimin a neihah he thu hi sawi lan a ni. He hunah hian Joel Joseph Denga, Mizoram Lokayukta chuan zirtirna a pe a, Kolasib DC Robert C Lalhmangaia te, David H Lalthangliana, Kolasib SP-te leh sorkar office hrang hrang leh tlawmngaipawl aiawhte he hunah hian an tel a ni. 

Joel Joseph Denga Mizoram Lokayukta chuan thu sawiin, "Mizoram chu India rama corruption tlemna ber pahnihna a ni," a ti a. "Amaherawhchu hemi ni chung hian document leh record a tarlan kher loh kan ramah eirukna lamah fihlim lohna tamtak inphum ru a awm a ni," ti bawkin, "Corruption chu mihring ze nghet lo leh anmahni chhungril a intan a ni," tiin, "Corruption do tur chuan keimahni kan insiam dik hmasak a ngai a ni," a ti.

Joel Joseph Denga chuan, Mizoram hmasawnna tamtak ti thuanawp tu chu kan duhamna a nih thin thu sawiin, pass diklo pekchhuah te, contract a nihna ang tur taka thawh loh te, sorkar sum leh bungrua hman khawlohte kan ramah a hluar thin chu pawi a tih thu sawiin, 'Corrupt kan ni tih pawh inhriat tawhloh chen a ngaia neih khawpa corruption a awm thei a ni," tiin, "Chutah tak chuan mahni kan chian a , Pathian hmaa dinpui tlaka kan hnate thianghlim taka kan thawh a pawimawh a ni," a ti bawk.