Aizawl April 14, 2024 : March 11, 2019-a Mizoram Larsapin chairman a lak luh hnua a taka hna thawk tan, Mizoram Lokayukta chuan ei ruk thubuai chhui tur 54 a dawng tawh a, kuminah pakhat a dawng tawh.

Lokayukta tar lan danin thubuai chhui tur a dawn tawh 54 zinga 23 chu titawpin regular investigation 23 neih mek a ni.

Thubuai 39-ah chhui chianna hmasa/preliminary enquiry (PE) neih tawh a ni a, PE report 31 dawng tawhin la tihfel loh (pending) pariat a awm.

Nikum khan thubuai paruk a dawng a, chungte chu - LAD Chakma Autonomous District Council (CADC) chungchang te, Green India Mission fund hman dik lohna awm nia tar lan te, Aizawl South I chhunga SASCE scheme fund hman dik lohna awm nia ngaih te, Congress thalaite thehluh, sawrkar sum Rs. Nuai 100 ziah bo leh Reiek Tourist Resort siamnaa fund hman dik lohna nia tar lan bakah, Meidum - Hortoki kawng siamna a sawrkar sum hman dik loh chungchangte a ni.

Kumin chhungin chhui tur pakhat dawng tawh bawkin, chu chu Mizoram Rural Bank, Champhaia Rs. Vbc. 21.61 tihchingpen thubuai a ni.