ZALEN March 2, 2025 : Mizoram Lokayukta-ah thubuai 72 ziah luh a ni tawh a, thiam loh chantir pali leh thiam chantir pakhat an awm tawh.

Mizoram Lokayukta report-in a tar lan danin, kum liam ta, 2024 chhung khan Lokayukta-in eirukna thubuai 17 an ziak lut a, preliminary inquiry tura tih niin, thubuai pasarihah report an dawng tawh.

Kumin 2025 chhungin thubuai pahnih an ziak lut tawh bawk a, chungte chu Mizoram Legislative Assembly Secretariat a Assistant Examination, 2024 buatsaih dan chungchang leh Lawngtlai Bypass Road-a parapet wall siam dan chungchangte an ni.

March, 2019-a Mizoram Lokayukta din a nih atanga February 28, 2025 thleng khan Mizoram Lokayukta hnuaiah thubuai 72 ziah luh a ni tawh a, chung zinga 46 chu chhui zui tlaka ngaih a ni.

Case hearing tum 38 neih tawh a ni a, thiam loh chantir pali leh thiam chantir pakhat an awm tawh a. Department proceeding tura tih thubuai pathum a awm tawh bawk.

March 11, 2019-a Mizoram larsapin chairman a lak luh hnua a taka hna thawk tan, Mizoram Lokayukta hian kum 2019-ah thubuai chhui tur pakua an dawng a, 2020-ah thubuai 15, 2021-ah thubuai 13, 2022-ah thubuai 10, 2023-ah thubuai paruk, 2024-ah thubuai 17 leh kumin-ah thubuai pahnih a dawng tawh.