LPS FIGHT NIGHT: Mala a remchan leh loh vangin Johnkenty Vana’n pro boxing a luhchilh dawn
![](https://zalen.s3.ap-south-1.amazonaws.com/images/news/1721733594_aa.jpg)
Hun tepterah R Malsawmtluanga a remchan leh loh avangin chawpchilh takin HC Johnkenty Vanhlimpuia inhnekpui tur thlak a ni a, Bosch Home Appliances LPS Fight Night-ah Pushpak Verma hmachhawnin professional a luhchilh dawn.
2019 LPS Pro Fight lightheavyweight champion a nih hnua a vawi khat nan Tuipui chhuanvawr Vana’n Mizoramah inhnek leh a tum a; July 26, Zirtawpni zanah LPS Arena, Falkland-ah Indian Army Sports Insitute, Pune-a awm mek Mala nen amatuer huangah round li inhnek tura puanzar tawh a ni.
A tirah engkim kal tluang thei vek turin Mala’n sawi mah se Zirtawpni khan harsatna a tawk tih a sawi a, an hotuten inhnek tura Mizorama haw phalna an pek mai theih loh avangin dilsak turin Fight Night buatsaihtute a ngen.
Organising Committee chuan Indian Army Sports Insitute enkawltu, Commandant Col Devraj Gill biain thil awmzia an sawipui bakah, e-mail hmangin lehkha an thawn a, inthlahrung tak chungin Gill hian, “Tunah chuan a remchang lo a, hun dangah erawh harsatna a awm ang,” tiin a chhang.
Organising Committee chuan Mizo mipui hmuh châk inhnek chhawpchhuah ngei a duh a, Indian Navy boxer Vana’n professional boxing luhchilh a duh bawk avangin chawplehchilh takin hma a la a, ni thum a la awm tihin thutlukna thar a siam phah.
Thawhlehniah Rajasthan boxer Verma nen light heavy huangah round li inhnek tura tihfel an ni a; kum thum kal taa a lo tum tawh, professional luhchilhna hun tha a neih theih dawn avangin Vana a lawm hle a ni.
Kum 28 mi, Verma hian professional boxing vawi thum khel tawhin a chak vek a, knockout hmangin mi pahnih a hneh tawh a. December 17, 2023 kha a inhnek hnuhnun ber niin Kolkata-ah technical knockout hmangin Jayesh Jayprakash Pandey a hneh.
Vawi nga Pro Fight champion ni tawh leh tum thum Inter-Services champion ni tawh, kum 27 mi Vana chuan Mala nena inhnek ngei duh mah se professional a luhchilh thei tur chu a duhthusam zawk a ni a, a hma lam hun hril thei tur zawk a nihzia a sawi.
LPS Fight Night vawi linaah inhnek vawi ruk a awm dawn a, a hnuhnung berah Vana leh Verma an innuai ang a. Bantam-ah Laldinsanga leh Ramdinthara intawng nawnin round ruk tura tih an ni a, a tirah professional boxing tum thum awm tura tih tawh chu pali a awm dawn ta a ni.
A hmuna en duh tan ticket Rs 100 man bakah Rs 200 man 52 siam a ni a; Ningani zing dar 8:00-ah inhnek tur boxer-te LPS Office, Zarkawtah inbukin LPS Auditorium-ah pho chhuak zui an ni dawn a, LPS 1-ah live-a pek chhuah a ni ang.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024