Aizawl August 17, 2022 : LPS Professional Fight Organising Committee Chairman Lalsawmliana Pachuau chuan August 31, 2022 atanga LPS Pro Fight a tel tur Boxer te leh Referee & Judge te chu Mizoram Boxing Association (MIZBA) ten an hrem a rin loh thu a sawi a, khawvel huap inelna Olympic-ah pawh professional boxer te telh phalsak an ni tawh, an ti.

MIZBA President chuan tun hnai khan thuchhuah siamin ZONET leh Aizawl District Boxing Association ten buatsaih an tum Mizoram Fight Night tih loh chu an hriatpui a nih loh thu leh a tel te chu an hnuaiah an khelh theih tawh loh tur thu an thuchhukah hian an tarlang. Hemi chungchangah hian Lalsawmliana Pachuau chuan Proffessional inhnek leh Amatuer inhnek chu thil danglam daih a ni tiin, LPS Pro Fight khel te hi MIZBA lam hian an thlahthlam a rin loh thu leh Boxer leh R&J te a tuartu-ah an tan chu thil ni theiah a ngaih loh thu a sawi.

LPS Professional Fight Organising Committee chuan proffesional buaipui kan awm a, amatuer buaipui an awm a, buaina tur awma an hriat loh thu an sawi. Amatuer International Boxing Association (AIBA) pawhin professional boxer te Olympic-a an khelh a phal tawh a, tun tum Commonwealth Games-ah pawh khan professional boxing khel tawh Amit Pangal pawh India-in a tir a, gold medal a la nghe nghe, an ti a, hetiang anih laia LPS Pro Fight a khel te an hnuaia khel thei tawh lo tura MIZBA in thutlukna an siam mai chu fuh lova an hriat thu an sawi bawk. 

Tun tum LPS Pro Fight-a Referee leh Judge te hi Mizo vek an nih tur thu Lalsawmliana chuan a tarlang, Boxer te erawh Mizoram pawn atanga rawn tel tum an awm thu leh form te pawh an thehlut tawh a, chutihrual chuan inbuk a la nih loh avangin thil engmah a la chian loh thu leh form thehlut boxer 193 an awm thu leh heng zingah hian Manipur leh Assam boxer an tel thu organising committee lam chuan an sawi.

LPS Professional Fight Organising Committee Chairman leh LPS Promotion neitu ni bawk Lalsawmliana Pachuah chuan tun tuma boxer titha te chu WBC India title la thei turin promotion kalpui an tum tih a sawi a, nakum lam atangin Title Fight thla tin vawikhat tal title fight kalpui an tum thu a sawi bawk.