Aizawl: Lalthara te Unau Foundation chuan Pathian thilsiam humhim leh chhawmdawl kawnga hna thawk tha pawl 5 hnenah lawmpuina thuziak leh tangkaifai cheng nuai 1 an hlan.

Lalthara te Unau Foundation hawnna hi Zirtawpni chhun dar 12 khan RB Mc Cabe Hall, Aijal Club-ah neih a niin LUF hi Dr. Tawnenga chuan a hawng a, mihring ten nungcha leh ramngaw te kan suasam mek tih sawiin pawi a tih thu a sawi. Dr. Tawnenga chuan, "Ramngaw leh tuihna humhalh kawngah nasa lehzuala tan kan lak a ngai a. Ramngaw ti chereu zawnga che thin te kan dodal ngam a ngai a ni," tiin Lalthara te Unau Foundation in hemi kawnga hmalak an tum chu fakawm a tih thu a sawi.

Lalthara te Unau Foundation aiawha thu sawitu Lalthara chuan foundation atan a bultan nan nuai 105 an thawhkhawm tih sawiin hei hi a bultanna tur leh an tu leh faten an la kalpui zel dawn tih a sawi a. Lalthara te Unau Foundation chuan Pathian thilsiam humhim leh chhawmdawltute tanpui let chu an ngaih pawimawh hmasak tur a ni tih sawi bawkin a tul dan a zirin zirlai harsa te pawh chhawmdawl zel an tum niin a sawi bawk.

Lalthara te Unau Foundation hawnna ah hian environment humhalh kawnga hnathawk tha pawl 5- Biodiversity Management Committee Sailam, Centre for Environment Protection, Mizoram Zoological Society, Save Mizoram Rivers leh Youth for Environment Justice Mizoram te hnenah thuziak leh cheng nuai 1 theuh an hlan a ni.  

Lalthara te Unau Foundation hawnna neih rual hian Upa Lalthara lehkhabu ziak 'Piang thar ni lovin Pathian hrin' tih chu Rev Zosangliana Colney in a tlangzarh nghal bawk.