ZALEN March 1, 2025 : Tuisang luia chengkawl khawrh tura kal, B. Lalneihkima (33) h/o Lalremruati, Hriangtlang, Serchhip district chu an ramvahna hmunah nimin khan thi a hmuh a ni a, mahnia chesual palh nia rin a ni.

Thudawn danin B.Lalneihkima hi a thian pathumte nen Ningani khan an khua leh Thinglian inkara Tuisang luiah chengkawl khawrh turin an kal a, an kal darh hnuah an haw dawna inhmuhkhawmna tura an ruahmanah a lan ve tak loh avangin zing dar 2:00 velah a thiante hian an hawsan.

Zirtawpnia amah ngaihven tura an kal chuan Tuisang lui kawrah thiin an hmu a. A lu-ah hliam a tuar a, chesual palh vanga thi niin an ring.

B.Lalneihkima ruang hi nimin khan vui a ni.