Aizawl June 14, 2023 : Vawiin khan St. Joseph HSS, Aizawl chuan kumina HSSLC result lawmna hun Vanapa Hall-ah an nei. Result lawmna Chief Information Commissioner Lalnunmawia Chuaungo, IAS (Rtd.)-in khuallian niin a hmanpui a. Zirlaite chu zirna leh kawng engkimah lum chuan luma vawh chuan vawh law law tur, tiin khuallian chuan a chah.

Lalnunmawia Chuaungo chuan, "Khawvel nuna zawm tur chu engkimah, zirna, eizawnna leh rinna ni se, kan kalna lamah lum chuan luma vawh chuan vawh law law tur a ni. Tumruhna leh tih hram hramna hi kan nunpui tlat tur a ni," a ti.

Khuallian chuan zirlaite chu an inchhir loh nan an thawh theih zawng zawngte thawka inchhungah engkim ti tura chahin, "Zirna kan ngaipawimawh hmasa ber ang a, kohhran leh khawtlanga inhmannain zirna a tibuai tur a ni lo," tiin a fuih.

"Tunlaiah nula tlangval mahni ina eirawngbawl thiam lo, nu leh pa-in pawhin an tihtir loh te an awm. An tihtir loh che pawhin ti rawh u, mipuitlinga inchhuaha tur a ni. Inah in tih theih ang tawk hna zawng zawng thawk rawh u, tih tak takin engkim ti ula in inchhir lo vang. Tuarchhelna leh puitlinna kawnga min hruaitu a ni," Lalnunmawia Chuaungo chuan a ti.

Education tum ber sawiin, "Ram, khawtlang, mahni leh chhungkua tana chhenfakawm nih hi zirna tum ber a ni," a ti.

Central Service lama Mizote tlin an harsat tak avanga zawhna tam tak awmah zirna mawhpuh a nih thin thute sawiin, zirna chu khawvel khawi hmunahmah sawiselbo a awm lo a ti a. Sawrkar lama a hnarkaituten ruahmanna an siam fel a ngai tih Lalnunmawia chuan a sawi. Chumi atan chuan rawtna thlen tam a ngai, zirlai naupangte chu sawrkara zirna thatna tur rawtna thlen ngam khawpa huaisen turin a chah.

St. Joseph HSS, Aizawl hian Class 11-12-ah hian Arts, Science leh Commerce neiin, a pathumah hian kumin result-ah Top Ten an nei a, Top ten 15 an nei tling a ni. Vawiina function-ah hian Dr. Sangthankima'n hunserh a hmang a, Principal C. Laltlansanga'n a kaihruai a ni.