ZALEN October 23, 2024 : Sumdawng lirthei neitute intelkhawm Mizoram Commercial Vehicle Union (MCVU) huaihawtin tukin dar 6 atang khan tuialhthei man sang avangin lirthei hrang hrang an ding a, tlai dar 4 vel khan lungawilohna hi tihtawp a ni. A huaihawttu lam chuan an hlawhtling thawkhatah an ngai.

MCVU hruaitute chuan vawiina lungawilohna an lantir chu an hlawhtling thawkhata an hriat thu an sawi a. Tuialhthei man tihhniam an nawr chhan chu khawvel kalphungah lirthei chuan man leh hman man a to nghal zel tih sawiin chu chu mipuiin an tuar nghal zel a ni an ti a. Mipuiin an tawrh lohna turin Mizoram sawrkarin tuialhthei man an tihsan chu tawlh ve hret se, lirthei chuan leh hman man tih to a ngai lo ang a, mipuiin an tuar lo thei ang tih ngaihtuahna nena lungawilohna chu lantir an nih thu an sawi a ni.

Hetihrual hian taxi leh two-wheeler taxi ten tlan luia an thlawp ve lo chu mak an tih thu an sawi a. Lungawilohna an lantir chungchangah dan leh thupek kengkawhtute leh mipuite atanga harsatna engmah an tawh loh thu an sawi a. Khualzin veivak tur harsatna tawk tlem azawng chu an awm thu sawiin damlo leh rikrum thila veivah ngai erawh an dan loh thu an sawi a ni.

Thudawn danin vawiina lungawilohna lantir avang hian bus chuang thin school naupang school pan tur eng emaw zatin sawrkar bus tlan lohna kawngah chuan harsatna an tawk a. Transport department bus tlanna kawngah pawh sawrkarin tlantir mah se, bus a chuan tum tam takin nidang aiin bus an chang rei thin hle ni a thudawn a ni.

Sumdawng lirthei thenkhat an tlan loh avang hian khawpui chhunga traffic duty ten an sawi danin kawngpui a thawl phah lutuk lo an ti a. Two-wheeler taxi leh taxi te an vaia sawrkarin a tlantir vang a nih an rin thu an sawi a ni. Two-wheeler taxi driver te chuan nidang aia tlanna a tam phah chuan loh thu an sawi a, hetiang chiah hian taxi driver te pawhin city bus nuar avanga tlanna a tam phah loh thu an sawi bawk a ni.

Hriat theih chinah Mizoram Taxi Association, Aizawl Two Wheeler Taxi Association, All Mizoram Commercial Tipper Association, Mizoram Indane Drivers Welfare, Mizoram Distributor Association leh veng hrang hranga vengchhung sumdawng lirthei pawl thenkhat ten an zawm ve lo a ni.

Vawiina sumdawng lirthei nuar tur avang hian mipuite harsatna sutkian nan sawrkar chuan MST Bus 14 khawpui chhungah a tlantir a. Zing dar 7:30 atanga tlai dar 5 thleng sawrkar bus te hi an tlan a ni.