ZALEN March 8, 2025 : Sawrkar laipui ruahmanna, ODOP (One District One Product), ‘District khat, thar chhuah chi khat’ tih hnuaiah Balhla chu Lunglei district ODOP a nih angin hma lak mek niin March 7, 2025-a C. Thuamluaia Mual, Lungleia Chapchar Kût hmannaah pawh Balhla leh Balhla atanga siam chhuah chi hrang hrang chuan a lailum a luah a ni.

Lungleia Chapchar Kût 2025 hmannaah hian Lunglei ODOP hmanga tual chhung siam chhuah ei tur chi hrang hrang chu Kût Nu, Health & Family Welfare Minister Lalrinpuii lawm nan thilpekah hlan a ni a. Kût Thlengtu, District Bawrhsap Navneet Mann chuan a hlan.

Kût lawmnaah hian kût hmangtu mipuite tan sawrkar department, pawl leh mi malten dawr (stall) chi hrang hrang hawngin heng zingah hian District Horticulture Office chuan ODOP stall an hawng ve bawk.

ODOP stall-ah hian Lungleia Balhla atanga thil siam chhuaktu (entrepreneur)-ten an thil siam chi hrang hrang - in chi (banana juice), kamram (banana chips), chhangphut (banana flour) leh a dangte chu a man tlawma lei theihin an chhawp a, kût chhimtute pawhin an hlut hle.

Hun hrang hrangah sawrkar thuneitute, mi pawimawhte leh khual thate an kal changin anmahni lawm nan thilpek hlan thin a ni a. Hetiang nikhua hian Lunglei district-a khual thate chu District ODOP Balhla leh Balhla atanga thil siamte hlan thin ni se tia ODOP hma lakna hnuaia ruahman a nih angin hun eng emaw lai atang khan thilpek atana inhlan hi chin a ni a. District ODOP chawi lar nan leh Balhla hmanga eizawnna tihhmasawn nan he thil hi chhunzawm zel tum a ni.