ZALEN July 17, 2025 : Ministry of Housing and Urban Affairs (MoHUA) buatsaih India ram puma khawpui fai inelna, Swachh Survekshan Award 2024-2025 chu vawiin khan New Delhi-a Vigyan Bhawan-ah sem niin, Lunglei chuan State Award pakhat, Mizoram khawpuite zinga faina kawnga hma hun eng ber lawmman, 'Promising Swachh Shehar Award' a dawng. 

Swachh Survekshan Award hi Swachh Bharat Mission-Urban (SBM-U) hnuaia inelna niin, he inelnaah hian India rama khawpui zawng zawngte chu tehfung hrang hrang hmangin an inel a. Swachh Survekshan Award vawi 9-na niin, khawpui len dan azirin inelna huang hrang hrang siam a ni a. Tun tumah hian award chi hrang 78 sem chhuah a ni.

Lawmman hi Mizoram sawrkara Urban Development & Poverty Alleviation (UD&PA) Minister K. Sapdanga hovin, Lunglei Municipal Council (LMC)-a Vice Chairman K. Lalrinawma leh Executive Councillor Lalhruaitluangi Sailo te, UD&PA Secretary Lalmalsawma Pachuau leh Director Jacob Lalawmpuia te'n Union Minister of Housing & Urban Affairs Manohar Lal kut aṭangin an dawng.

Kum 2016-a Swachh Survekshan Award bul tan a nih atangin Lunglei khawpui chuan award 6 a dawng tawh a. Tun tuma award a dawn bakah hian, kum 2019-ah 'Best City in Innovation and Best Practices in Northeast Zone'; kum 2021-ah 'Best City in Citizen Feedback in North East Zone (Population 50 thousand - 1 lakh)'; kum 2022-ah 'Clean City in North East Zone (Population 50 thousand - 1 lakh)'; kum 2023-ah 'Clean City in North East Zone (Population 50 thousand - 1 lakh)' leh 'Clean City within Mizoram (Population below 1 lakh)' te a lo dawng tawh a ni.