ZALEN March 2, 2025 : Zirtawpni chawhnu khan Mizoram State University din tur chungchanga Non-Government Organisation Co-ordination Committee, Lunglei atangin Lunglei-ah dah ni se tih leh Champhai District NGO Co-ordination Committee atangin Champhai-ah dah ni se tih sawrkara lut chu sawi ho a ni.

Sawi hona hi Higher & Technical Education Minister Dr. Vanlalthlana chuan kaihruaiin Lalrinpuii, Minister & MLA, Lunglei East te; V. Malsawmtluanga, MLA, Lunglei North; Lalramliana Papuia, MLA, Lunglei South-te; Er. Ginzalala, MLA, Champhai North-te leh Higher & Technical Education Department officer-te an tel.

Meeting chuan NGO-te dilna hi tih awm tak nia ngaiin a hrethiam hle a. Chutih laiin Mizoram sawrkarin state university din tura hma a lo lak tawh dan leh din ngei ngei a ngaih dante inhrilhfiah a ni a. National Education Policy (NEP) 2020-in a phut angin central university-te chu 2035 atangin research-intensive university a nih a tul tawh dawn a. Central university-ten degree an pek tawh dawn loh avangin state university-ten an pek a ngai tawh dawn a, chumi tur chuan Mizoramin State University a neih a ngaih tawh thu sawi lan a ni.

State university nei tur hian sum tam tak sen belh a tul dawn a. Mizoram sawrkar sum dinhmun a that tawh loh avangin state dangte tih dan pawh a hmuna tlawha zir chian a ni a. State university hi campus zau tak neia din chu duhthusam a nih rualin, Mizoram sawrkar sum dinhmun thlirin chu chu kalpui theih dawn loha ngaih a ni a. Chuvang chuan, State thenkhatten State University an kalpui dan angin college neih sa te hmang tangkaiin Mizoram State University chu clustered university kal phunga din turin Mizoram sawrkar chuan hma a la ta a ni. NEP 2020 duh dan angin State University chu multidisciplinary-a kal a ngaih avangin college eng emaw zah chu sawi khawm (cluster) tum niin, resource neih sa inhman tawm theih chu inhman tawm tura ruahmanna siam a ni.

Hemi mil hian Mizoram State University Bill, 2025 chu Assembly Session kal lai mekah hian theh luh a nih thu inhrilh fiah a ni.