Aizawl: Nikum 2022 chhung khan sazu in Mizoram loneitute buh leh bal hectare 2,887.45-a zau a ei chhia a. Sazu hi Lunglei, Mamit leh Hnahthial district-ah a che nasa zual.

ZALEN-in Agriculture Director James Lalsiamliana hnen atanga thu a dawn danin district hrang hrang atanga report an dawnah chuan Mizoram district 11 zingah Kolasib, Saitual leh Khawzawl district tih loh district dangah chuan sazu hian lo neitute buh leh bal an khawih vek a, sazu hian khaw 91-a kuthnathawktu 3,084-te chu a tibuai niin a sawi.

Agriculture Director chuan district 11 zingah Lungleia chhungkaw 34, Mamita chhungkaw 21 leh Hnahthiala chhungkaw 14 chu tuar nasa zual niin report an dawng tih a sawi a. Mahse, heng district pathumte hi District Agriculture Officer-ten an enfiah loh avang leh VC-te atanga report hi siam an nih avangin tuna sazu tihchhiat nia sawi ai hian a tlem zawk thei niin a sawi bawk.

Kumina sazu a pun chhan chu rawnal a tam vang nia an hriat thu sawiin Agriculture Director chuan, “Nikum khan rawnal a tam a, hei vang hian sazu hi an inthlahpung deuh thut niin kan hria a. Heti chung hian chhiat buaihna ang chi kha thleng lovah kan ngai a, lo neitute pawhin an tuar lutuk lo niin kan ngai a ni,” a ti.

Sazu in buh leh bal a tihchhiatte tan zangnadawmna a awm theih leh theih loh zawhna chhangin agriculture director chuan, “Mizoram sawrkar atang chuan hetiang lam hi a awm lo a. Mahse, tun hnaia Mizoram rawn tlawhtu Union Minister of State Kailash Choudhary hnenah khan zangnadawmna pe turin an ngen a, engtin nge sawrkar laipuiin a bawhzui zel dan tur chu kan hre lo a ni,” a ti a. Sazu in a tihchhiat zat chu sum leh pai ang zawngin a zat an chhut lem lo niin a sawi bawk.

Mizoramin Thing tam a hmabak tih sawi bawkin Agriculture Director James Lalsiamliana chuan, “Kan hma lawk kum 2/3 maiah hian Thing tam a thleng dawn a, hemi atan hian department chu kan inbuatsaih tan a. Mautam pawh buai lutuk lovin kan hmachhawn thei a, Thing tam pawh hi harsa lutuk lova kan hmachhawn theih mai kan beisei a ni,” a ti bawk. 

2022-a sazu chet dan
District         Khua    Lo neitu    Hactare
Aizawl           3          19               3
Lunglei         34         1,558          243.10
Siaha            1           15               2.8
Champhai     1           6                3
Serchhip       5           92               32.48
Mamit          21          763            305.8
Lawngtlai      8            60              17.82
Hnahthial     14          476             305.45
Total             91          3084           2.887.45