ZALEN July 1, 2025 : Lunglei Municipal Council (LMC) ruahmannaa 'Lunglei Ni' hman tum atana LMC Executive Council-in hmala tur Organising Committee a din chu vawiin khan Lunglei Convention Centre-a LMC BoC Hall-ah a tum khat nan an thukhawm a, March 1889 thlir chungin a Ni tur hi ruat an tum.

June ni 6, 2025-a LMC Board of Councillors thukhawm-in 'Lunglei khawpuia cheng, thang leh thar zelte'n Lunglei khawpui hmangaihna thinlung an put thar zel theih nan Lunglei puala ni bik hman' chungchanga inrawn khawmna buatsaih ni se a tih angin, June ni 16, 2025 khan inrawn khawmna hi buatsaih a ni a. He inrawn khawmnaah hian 'Lunglei Ni' hman chu tha tih a nih angin LMC chuan Organising Committee a din nghal a ni. 

Organising Committee chuan Lunglei puala ni bik hman tur hi a hmingah 'Lunglei Ni' vuah ni se, an ti a. A hman hun chhung atan mei mit lova Lunglei luah tan a nih hun nia hriat, March 1889 thlir chungin February - March 2026 tin zawn a ni a. Lunglei din ni chungchanga chhinchhiahna awm sa nemngheh nan National Archive-ah lehkha pawimawh leh chhinchhiahna hluite hai a, zir chian ni se, chumi hnuah a ni tak tur chu la rel that ni se, tih a ni.