ZALEN July 7, 2025 : Lunglei pa hriat hlawh, Congress hruaitu hlun Upa Sanghlira Colbert h/o Zosangi, Chanmari, Lunglei chu nizan khan pum chhunga thisenzampui puak keh (aortic aneurysm) vangin a thi a, lumen pui niin vawiin chhun dar 12 khan vui a ni.

Sanghlira Colbert hi Mizo ten Central minister a la neihchhun Dr. C. Silver-a kha a u a ni a, MSACS Project Director thin Dr. Eric Zomawia h/o Dr. Lily Chhakchhuak hi a fapa a ni a. David Lalchawiliana h/o Sairengpuii Sailo leh Dr. Irene Colbert w/o Rev. Dr. Lalbiakliana te a nei bawk.

Zirna lamah Wilson College, Bombay atangin B.A (Economics special) a zo a, Govt High School Lungei leh Lunglei Govt College-ah te a thawh hnuah 1969 khan amahin New Activities (NA) English School a din a, 2003 kha he sikul hi sawrkarin a laksak.

Ram buai laiin MNF sipai-ah kum hnih a ramnmu a, Foreign Secretary leh Ambassador nihna te a chelh hman a, 1968-ah Indian National Congress a zawm a, 1970 atangin kum sarih chhung LDCC President a ni. MPCC Executive Committee member term thum a ni a, All India Congress Committee-ah term hnih member a ni bawk.

Mizoram sawrkar sponsored Department hrang hrangah nihna pawimawh tak tak chelhin Mizoram Rural Bank-ah Director, Board of Directors kum 10 chu a chelh a, All India Radio, Director, Board of Directors kum 4 chhung a ni a, ZIDCO Member kum 4 chhung a ni a, Telecom Advisory Committee-ah kum 4 member a ni bawk.

Sanghlira Colbert hi 1995 khan BCM Chanmari Lunglei Kohhran-ah Rawngbawltu atan thlan a ni a, 1999-ah Upa atana thlen leh a ni a, 2000 khan Rev Lalber Khawpuimawia chuan Upa atan BCM Hrangchalkawn Kohhran-ah a nemnghet a ni.