ZALEN Nov. 28. 2024; Mizoram sawrkarin Lunglei DC leh DIG (Southern Range) bakah SP atan hnamdang thiau a dah chu Lunglei mipuiin an helh hle a, an ngenna siam angin sawrkar chuan a thuchhuah sut leh nghalin SP sawn a ni ta lo. 

YMA thuchhuahin a tarlan danin, Superintendent of Police (SP) tura Shivam Siddarth IPS dahna Order sut a ni ta chu YMA Sub Hqrs. Lunglei chuan lawmawm a ti a, SP thar tur hi an duh loh hrim hrim vang a ni lo a. District awptu atana Mizo tawng hmang theilo vek an awm hi an rawngbawlsak mipuite tana harsatna lian tak tling a, an tan pawh thil tha ber ni ah an ngaihsak lo an ti.  

Lunglei YMA Sub.Hqtrs chuan nimin khan thuchhuah siamin Lunglei Dist.awp tur a hnam dang vek dah a ni chu thalo an tih thu an chhuah a. DC kalta kha sawn anih dawnin sawn lo turin Mizoram sawrkar an lo ngen tawh thu leh a hlawhchham ta a ni tih sawiin, DIG (S-R) nakum lawka pension tur chu sawn a ni a, a aiah hnamdang dah a ni. SP ah hnamdang bawk dah leh a ni. Lunglei dist. hi a zau in hnam hrang hrang awm khawmna a ni a, chuvangin tawng thiam lo leh dist.dinhmun hrethiam lo vek tan chuan Law & Order ah harsatna a awm thei a ni an ti.