April 27, 2023; Lunglei police te chuan nimin khan Lunglei khawpui tui lakna ber  Tlawng lui tura hraitu a puh mi pathum (3) an man a, nizan khan District Jail, Lunglei ah dah luh nghal an ni.

Police thuchhuah tarlan danin, nimin khan SDO, PHED Lunglei atangin FIR an dawng a, PHED tui pump na Pialthleng luiin Tlawng a pawhna hmun, Lunglei khawpui tui lakna ber Pialthleng pump house duty te chuan kaikuang leh chakai thi engemaw zat an hmu a, hemi avang hian Tlawng lui hi tura hrai ni ngeia hriat niin tui pump lai pawh tihtawp nghal a ni.

Lunglei police station ah Case No. 84/23 Dt. 26/04/2023 u/s 429/277 IPC r/w Sec. 24 (6) of the Mizoram forest Act r/w Sec 43/24 (1)(a) of the Water(Prevention and Control of Pollution) Act ziahluh nghal niin, rang taka chhuizui nghal a ni.

Police te chu thil thlenna hmunah kal nghalin uluk takin an enfiah a, finfiahna tur thil hrang hrang an lakkhawm nghal bawk 

He thil thlenna hmuna lirthei a(Maruti Suzuki Eeco bearing R/No. MZ02 C1368) nena kal, thil tisualtu ni ngei a hriat mi pathum - 1). Lalawmpuia (43) s/o Thunrai, College Veng, Lunglei, 2). Lalfakawma (26) s/o Lalrinhlua of College Veng, Lunglei) leh 3). Lalmuankima (32) s/o Tangkarai, Rahsi Veng, Lunglei te chu man niin uluk taka thu zawhfiah an ni a, lui hraitu an ni ngei tih an inpuang a ni.

Lui hrai nan a damdawi an hman hi 'Record' (Cypermethrin 10%) a ni a. Thil tisualtua puhte hi zanin la la in Judicial Custody (District Jail, Lunglei)-ah dahluh nghal an ni.