August 4, 2022; Thawhlehni zan dar 7 rik hma deuh a Sihhmui leh Lengpui inkar Tlawng lei bul a mi pali chuanna car MZ 01 U - 1162 chesual a chin hriat loh a awm C. Lalfakzuala (Mafaktea) te pafa chu ngawrh taka zawn chhunzawm zel an ni a, he thu ziahlai zanin tlai thlengin an chin hriat a la ni lo.

ZALEN thudawn danin vawiin lam khan Central YMA ruahmanna siam angin, khawpui chhung branch hrang hrangte bakah Sairang leh a chhehvel YMA branch te hnatlangin an thawkchhuak a, an chetsual zan atangin Sihhmui, Sairang leh Sairang Dinthar branch YMA te chu an huamchhung theuh ah venbuk siamin, tlaivarin an duty thin bawk.

Tun thleng a chin hriat loh a la awm Mafaktea te chenna Chaltlang Lily veng branch YMA pawhin zanin atanga tlaivar a duty turin ruahmanna an siam a, an vengchhunga section YMA te chu a inchhawkin tlaivarin an duty thin dawn a ni.

Tlawnglui ah tui a la tam avangin vawiin tlai thleng khan an chuanna motor pawh lakchhuah theih a la ni lo a, tlai thim dawn thleng khan NDRF te chuan lakchhuah tumin bei mah se, motor chhungah chirh a tam tawh avangin hrui thlunna tur hmuh/dap fuh a harsa rih nia thudawn a ni. 

Central YMA disaster response team te lawng hmangin an kal kual reng a, hmun hrang hrang a duty post ah te a theih ang angin mit len reng a ni. Sairang chhehvel bakah, Mualkhang, Hortoki leh Bairabi lamah te pawh venbuk te siamin, ngawrh takin Mafaktea te pafa chin chang hi an lo ngaihven reng bawk.

Tun thlenga chin hriat loh a la awm Mafaktea te pafa hian lainattu an ngah hle a, an chenna in Chaltlang Lily veng lamah pawh anmahni lainat a lenglut an awm reng bawk. Mafaktea hi a nu Rozingi ho vin, a nupui fanaute nen a khawsa an ni a, a pa boral tawhin, amah hi an inpui nghaktu, an unau zinga naupang ber a ni.

A nupui Rebecca Lallawmzuali nen fa 3, mipa 1 leh hmeichhia 2 an nei a, chetsualna a tel tun thlenga a chin la hriat loh a awm Malsawmkima (Sawmsawma) hi an fapa neihchhun niin, Noah's Foundation School, Chaltlanga Class - IV zirlai a ni.