Aizawl: August ni 2, 2022, Thawhlehni zan dar 6:30 bawr vela Tlawnga car chesuala tel, chin hriat loha awm zui ta, C. Lalfakzuala @ Mafaktea (39) h/o Rebecca Lallawmzuali leh a fapa, Malsawmkima (10) te chu he thu ziah lai, nimin tlai thleng khan hmuh an la ni lo.

ZALEN thudawn danin Mafaktea te pafa zawn hna hi Central YMA ruahmannain Aizawl khawpui chhung leh Sairang chhehvel YMA branch-ten a inchhawkin an thawk mek a, an tlakna hmun atanga Tlawng dung thlang lamah venbukte siam niin Sairang, Sairang Dinthar leh Sihhmui branch YMA bakah Mafaktea te chenna, Chaltlang Lily Veng Branch YMA ten chhun zan zawmin chung venbukte chu an awmchilh a; Sairang thlang lam, Khamrang, Hortoki leh Bairabi lamah pawh venbuk siam a ni bawk

Central YMA hnuaia Disaster Response Team te bakah, SDRF leh NDRF te leh Sairang chhehvela tui thiamten lawng hmangin Mafaktea te pafa zawn hna hi ngawrh takin an thawk a ni.

Ruahsur vanga tui a nut vang te, tui a len vangtein duh angin Mafaktea te pafa zawn hna hi thawh hleih theih a ni lo thin a, an chetsualna car pawh nimin tlai thleng khan lak chhuah theih a la ni lo.

Chin hriat loh a awm mek, C. Lalfakzuala hi Chaltlang Lily Vengah a nu, Rozingi hoin, a nupui fanaute nen a khawsa an ni a, fa pathum neiin, Malsawmkima (10) hi an fapa neihchhun a ni a, Noah’s Foundation School, Chaltlanga Class -IV zirlai a ni.