Maharashtra-a Nashik-ah Inrinni tuk khan nasa takin bus a kang a, mi 12 vel thiin mi dang 38-in hliam an tuar bawk niin thuneituten an sawi.

Bus hian Nashik-Aurangabad highway-ah disel phur trailer truck suin a kang zui ta niin an sawi. 

“Thi tam zawk hi sleeper coach bus-a chuangte an ni a. Hliam tuarte pawh damdawi inah lak nghal an ni,” tiin Amol Tambe, Deputy Commissioner of Police, Nashik chuan a sawi.

Thubuai an ziah luh nghal thu leh a kan mai chhan hi chhui zui a nih tur thu a sawi bawk. 

Video thehdarhah chuan bus hi kang\helhtuten \helh tuma an beih mek laiin mei nasa takin a inhlap zuai zuai tih hmuh theih a ni.

Thil thleng hmutute chuan chhiatna hi zing dar 5.15 vela thleng a nih thu leh police leh ambulance an koh nghal thu an sawi.

Kangmei chu a nasat nghal em avangin mi chhanchhuak tura chet ngaihna pawh a awm lo niin an sawi bawk.

Prime Minister Narendra Modi chuan thite chu Rs. nuai hnih theuhva ral an nih tur thu leh hliam tuarte pawh Rs. 50,000-a kan an nih tur thu a puang.

Chief Minister Eknath Shinde pawhin thite hi Rs. nuai ngaa ral an nih tur thu a puang bawk.

Maharashtra sorkar chuan hliam tuarte enkawlna senso a tumsak vek dawn tih state minister Dada Bhuse-a’n a sawi bawk. 

Thuneitute chuan hliam tuar zingah hian na tak tak an awm avangin thi hi an la pung leh thei niin an sawi.