Tukin zing lam khan Maharashtra-ah Australian lawng che sual hmuh a ni a, he lawngah hian chuang an awm lo tih Maharashtra Home Minister Devendra Fadnavis chuan a sawi. Lawng hi dap nghal a ni a, AK-47 pathum leh bullet an man a ni. 

Lawng hi Muscat atanga Europe pana kal a ni a, a chetsual chhan hi hriat a ni lo. Lawng hi Raigad district-a Harihareshwar beach-ah hmuh a ni a, mipui an ralkhel hman hle. Police ten an finfiah nghal thuai a, he lawng neitu hi Australian a ni a, tunge a nih erawh he thu buatsaih lai hian hriat a la ni lo. Lawngah hian AK-47 leh bullet an hmuh avangin helte ta a nih rin a ni a, finfiahna erawh a la awm lo thung. 

Raigad district-a Bharadkhol-ah pawh lifeboat hmuh a ni a, mahse mihring hmuh tur an awm lo. A hmun hi coast guard leh Maharastra Maritime Board te chuan an thlithlai nghal a ni. Hetih lai hian helte chet velna a ni ang em tih chu finfiah mek zel a ni. 

Fimkhur thilah police te chu in ralrin tir an ni a, Indian coast guard te pawh hrilh hriat nghal an ni. Raigad Superintendent of Police Ashok Dudhe leh official dangte chuan a hmun hi an thleng nghal a, Intelligence offial te chuan he lai bawrah hian thla liam ta khan Sri Lanka atanga kal lawng an hmuh thu an sawi ve bawk.