June 13, 2023; Kar hmasa Zirtawpni chawhnu dar 2:05 vel a Falkland Veng, Aizawla hnamdang pakhat amah leh amah inkap hlum chu tukin khan Muanna Veng thlanmual ah vuiliam a ni.

Media hrang hrang a tarlan tawh angin, Zakamlova Firing Range-ah target shooting neiin a bulah instructor hmeichhia pawh a awm a, vawi hnih target-ah kapin a vawi thumna-ah a silai chu a ka-ah rawlhin a inkap ta mai ni a hriat a ni.

Police ten amah hre tura an chhuina-ah documents hmuh theih ang ang te atanga, a lan danin amah hi Jones Cedric-Goeffrey (62 vel) niin, a permanent address chu Vishakapatnam, Andhra Pradesh a ni a. A chen mekna erawh Sunkada-katte, Bengaluru, Karnataka ni a hriat a ni.

Aizawl Civil Hospital Mortuary-ah dah a nih hnu leh a chhungte biakpawh an nih hnuah, Mizorama phum mai turin thutlukna leh ruahmanna siam a ni a, tukin khan Muanna Veng thlanmual ah vui a ni a, amah hi Catholic kohhran nia hriat a ni.