Aizawl: Human Resources Development Board Vice Chairman Dr. L Thangmawia chuan, "Mahni hnam tawng dah pawimawh leh thiam chunga English leh hnamdang tawng kan zir nasat a ngai a ni,"a ti.

Mission Vengthlang Govt. Primary School in Zirtawpni kaltaa an kum 60 tlin Diamond Jubilee an lawmna ah he thu hi sawiin Thangmawia chuan, "Mahni hnam tawng, Mizo tawng ngaihhlut kan zir a ngai a, mahni tawng hmang dik lo te kan innuihzat a hun tawh a, mahni hnam tawng ni lo, English hmang dik lo te kan nuihzat thin hi sim a hun tawh zawk a. Sap ho ngei pawhin an tawng kan hman dik tawk loh tumin kan pianpui tawng a nih loh avangin min hrethiam em em thin zawk a ni," a ti.  

Khualzahawm West III bialtu MLA V.L.Zaithanzama pawhin thu sawiin Kohhran sikul sawrkarin a lak hian a zirtirtu leh a building ngai tho ah a hma aiin a tha lo thin hian ngaihtuahna a ti thui hle a ni, a ti bawk.

Govt. Middle School, Mission Vengthlang hi kum 1962-a din a ni a.Tun dinhmunah thawktu 5 awm mekin he sikul hian MCS, MFAS, Doctor, Engineer, kohhran Upa, Pastor leh khawtlang hruaitu tha tak tak engemaw zat a lo chher chhuak tawh a ni.

He hunah hian he sikula zirtirtu lo thawk tawh te, he sikula zirchhuak mi hlawhtling tak tak te leh Mission Vengthlang huamchhunga tlawmngai pawl hruaitute leh sawmbik mi thahnem tak an tel a ni. Inkhawm hi Pu Zobela, Headmaster-in kaihhruaiin he sikul chhuak Rev. Dr. Malsawmzolian’n hunserh a hmang a, Organising Secretary Pi Lalhlupui’n report pe in Upa Lalnunfela’n lawmthu a sawi zawhin tawngtaina hmanga hun hi tihtawp a ni.