ZALEN August 8, 2025 : BJP Mizoram chuan vawiin khan Political Session an nei a, Dr. K. Beichhua, MLA & State President-in member thar lakluhna leh thusawina hun a nei a, main stream zawm leh main stream zawm lo a inan theih loh a ti.

Dr. K. Beichhua, State President chuan thusawiin, BJP National Headquarters an tlawh chungchang te report a pe hmasa a, "BJP inkaihhruai dan chungchang leh BJP-in kan mission pawimawh ber Development a lo thlen theihna tur atana remruatna fel tak siam turin hma kan la a ni," a ti.

Dr. K. Beichhua chuan, "Luipui atanga tui kan lak chuan kan kham khawp aia tam mah kan tui mamawh kan hmu thei dawn a, luite tui kan lak erawh chuan kan kham khawp tui kan hmu thei dawn lo thung a ni. Chutiang chiah chuan Main stream zawm leh Main stream zawm lo chu a in ang thei lova, vawiina kan dinhmun pawh hi lui te tui atanga tui la ang mai kan ni a, kan kham khawp tui kan hmu meuh lo a ni. Chuvangin vawiinah chuan lui lian atanga tui kan lak ve hi a hun tawh a ni," a ti a. 

BJP State President chuan, "Vawiinah hian Mizo thalai lehkhathiam hmun hrang hranga mite leh Mizoram mipuite hian Regional anga kan kal chuan kan hmalam a êng lo hle a ni tih hria a, National Politics thlir chunga kan ram leh hnam din chhuahna tur thlir chunga, ke pen turin ka sawm che u a ni," a ti bawk.