Footballer hriat hlawh tak, nikuma thi ta, Diego Maradona-a sana pakhat, Hublot siam chu Assam police leh Dubai-a thawktute tangkawpin an hmu chhuak tin Inrinni khan Chief Minister Himanta Biswa Sarma chuan a puang a, mi pakhat man a ni.

“India-a LEA hnuaia Assam police leh Dubai Police HQs tangkawp chuan Hublot sana hlu tak, Maradona ta chu hmuh chhuah niin mi pakhat, Wazid Hussein-a man a ni a. Dan angin a chungah hma lak zel a ni ang,” tiin Sarma chuan Twitter-ah a tar lang.

Director-General of Police Assam chuan Maradona-a’n hming a ziah hnan, siam chhuah zat bituk (limited edition) sana hi Hussain-a hian ruin an state-ah a tlanchhiatpui ta niin a sawi.

“Dubai police-in central agency an rawn hriattir a, Hussain-a hian limited edition Maradona Hublot sana hi ruin Assam a thlenpui tih an hrilh a. Inrinni zing dar 4:00 khan Sibsagar-a an chenna inah man a ni a, sana pawh hmuh a ni,” tiin Twitter-ah a tar lang.

Sana hi Dubai-ah Maradona bungraw dang te nen kawl that a ni.