Nau a piang a, zirtir hran em em ngai lovin nuih mai maite chu amahin a thiam ve maia ngaih a ni a; mahse, a lo ni lo deuh nge ni, a zira zir tham angin an chhuah ta tlat!

Japan ramah chuan Covid-19 a len vanglaia hmai tuamna hman a ngai a, tunah erawh a ngai ta lo va; mahse, nghawng danglam tak a neih chu, hmai tuam nasate khan nuih dan an lo theihnghilh hman hlauh mai a, nuih zir thar leh turin tam tak zirnaah an inziak lut tlat mai.

Asia khawmualpui khawchhak ramah hian hri a len hma pawhin hmai tuam hi an uar sa a, boruak a inthlak lai velin tlang hri leng a tam a, khawsik mai a awl a. Sorkarin Covid avanga hmai tuam tur a tih khan hmang ngai lote pawhin an hman phah nasa hle.

Kum thum vel a vei hnuah March khan sorkarin hmai tuam a ngai tawh lo tih thu a chhuah ta a; mahse, hmai tuam lohva nuih dan thiam lo an lo awm teuh tawh.

An zinga nula pakhat, Himawari Yoshida chuan, “Ka hmaia ka nuihna tha (facial muscle) kha COVID lai zawngin ka hmang lo a ni,” a ti.

Kum 20 mi hian ‘smile instructor’ a ruai ta hial a, an rama hna zawnna atana tangkai, nui hmel pu leh thei turin ‘exercise’ a la thar mek.

Yoshida-i leh a thiante eng emaw zat chu Keiko Kawano-i’n zirtirna a pe a, darthlalangah inenin an an kutzungtangin an ka leh hmui vel siksawi dan an zir leh mek.

Kawano-i company, Egaoiku hi ‘Smile Education’ tihna a ni a, an class-a nuih zir tura inziak lut chu hmai tuam loh a theih hnuah a let li zetin an tam tih a sawi a, mal khalha inzirtir tum khat man chu Yen 7,700 (£44) zet a ni.

Kawano-i hian Japanese-te hi khawthlang mite aiin an nui tlem hrim hrim niin a sawi bawk.