Ireland-a comic book fan pakhat chuan Marvel-in character a siam zinga a duh ber, ‘Deadpool’ kaihhnawih thil chi hrang hrang 2,250 zet a la khawm tawh.

Gareth Peter Pahliney-a hi South African niin Ireland-a cheng a ni a, Cloghan, Offaly-a an chenna ina pindan pakhat chu anti-hero Deadpool kaihhnawih thil dah khawm nan hmangin a thil lak khawm 2,250 zet chu a rem dul mai a ni.

Pahliney-a hmun hi Guinness World Records pawhin Deadpool memorabilia lak khawmna hmun lian ber niin a puansak hial tawh a ni.

Wade Wilson tia an koh bawk, Deadpool hi Fabian Nicieza leh Rob Liefeld ten December, 1980-a Marvel Comics series New Mutants an tihchhuahah an chhuah tan kha a ni a. A comic behchhan hian kum 2016 film siam niin hetah hian Deadpool lemah hian Ryan Reynolds a chang nghe nghe.

Pahliney-a hian Reynolds-a hi a channa film kaihhnawih thil a lakkhawmna hmun tlawh ve tur hian a sawm tawh niin a sawi.

“Deadpool cave-ah hian a chan character kaihhnawih ka dahnaah hi rawn tlawhin thlalakpui chauh ka duh a, a hlu dawn hle a ni,” tiin Guinness World Records hnenah a sawi.

A thil lak khawm zingah hian comic book, action figure, lim, poster leh thil dang dang a ni a. A pung hret hret zel tih a sawi bawk.

“Dam chhung daih a ni dawn a, thla tin thil thar ka dah belh a. Lak khawm belh ka neih hian Deadpool fan dangte hnena pho lan hi ka châk thin a, vantlang tan erawh ka hawng lem lo va, hawng turin thil erawh buaipui ve tan mek a ni,” a ti.

Pahliney-a hian a thil lak khawm man chu thup tlat a nih thu a sawi a. “Ka nupuiin a hriat chuan min that duh mai ang,” a ti fiamthu a ni.