Florida, US-a tun hnaia hurricane a thawh chiam hnuah tuipui kamah lawng keh chhia ruangruh hmuh thar a ni a, hei hi a lo khuh thintu lei a kal ral nasat avanga lo lang ta nia ngaih a ni.

Volusia County Beach Safety chuan lawng ruangruh ni ngeia ngaih, feet 25 atanga 30 inkar vela sei tur chu kar liam ta khan Daytona Beach Shores bulah hmuh a ni tih an sawi a ni.

An pawl hian he thil hi eng lawng ber nge a nih hriat loh ruangam ngei a nih an ring tih an sawi a, a hma zawnga lo khuh botu vaivutte chu nikuma Hurricane Ian leh Fiona na tak thawka thli leh tui fawnin a len bo zo va, a lo lang chhuak ta niin an ngai a ni.

Beach safety thuneitute chuan mipuite chu helai hmun hnaiah hian kal rih lo turin an ti a. Research team-in Thawhtanni hian an en fiah dawn a, an rin angin lawng ruangam a lo ni reng em tih an en dawn a ni.

December thlaah pawh khan Volusia County-ah hurricane avanga lei kal ral nasa lukin a lo khuh bo thin lawng chhia hmuh a lo ni tawh bawk.

US hian tun hnaiah hurricane na tak tak a tuar rualin khua pawh a kheng nasa a, hmun tam takah dil kang hnuaia thil mak tak tak lo lang ta pawh a awm a, thil bo tam tak pawh hai chhuah a lo ni tawh hlawm a ni.