Thil maksak tehchiam chu a ni chiah lo va; mahse, a danglam ve angreng hrim hrim a. Inrinni kal taa Britian lal thar, Charles-a lallukhum khumtirna inkhawma tel tura Ukrainian first lady an sawmna lehkhaah khan an lo chhu sual ve hlauh mai a, first lady hian chhuang taka social media-a a dah chhuaha dik lo lo lang ta chu an sawi zui nasa hle.

Olena Zelenska-i hian lal chhungkaw hnen atanga sawmna a dawn hi Twitter-ah a thlalak a dah chhuak a. “Sawmna hriat reng hlawh tawh tur,” tiin King Charles III leh Queen Camilla chu ro an relna tura tha taka an tih theih nan duhsakna a hlan bawk.

Mahse, Twitter hmangtu tam tak chuan an ram hming inziaka ‘Ukraine’ tih turah ‘r’ an lo ziah hmaih chu an lo hmu nalh a, ‘Ukaine’ tih ringawtin envelope leh card-ah a lo inziak a ni.

Pakhat chuan, “Khawngaih takin hetiang lallukhum khumtirna pawimawh lutukaa ziah sual palh a awm tih hi min hrilh suh,” tiin a comment.

Mi dangte pawhin tihsual hi an hmu chat a; mahse, tam tak chuan tihsual palh theih a nih thu an tar lang bawk.

Thenkhat chuan saptawng hlui (old English)-a hawrawp kir (cursive)-a ziah dah a ni hrim hrim niin an sawi ve bawk a. “‘K’ leh ‘R’ hi pakhat ang a ni! A chunga pir awmah pawh hawrawp pahnih tih a lang reng,” an ti.

An lo enchiang tawk lo emaw pawh lo ni ta se, Ukrainian first lady hian inkhawmah hian an ram ai a awh a, a thlen chinah pawh ngaih pawimawh a hlawh em em a, indonain a tihbuai ram atanga kal a nih angin miin an ram lam an tang tih a hriat chu a lawmna pakhat a nih thu a sawi.