Missouri, United States-a pawl hnih zirlai mipa naupangin a piancham lawmna balloon thlawh bo chu mel 500 zeta hlaah him piala hmuh leh a ni a, a lo chhartu hian pe kir leh thei lo mah se thil pek dang leh lehkha a thawn thung.

Kason Johnson-a hi a nuin a pianchama an chhungkaw car-a an sikul, Mountain Grove Elementary School in Mountain Grove, Mo., atanga a hruai haw chu a kum riat tlin puala an sikula an lo pek balloon thlawk thei bawr a keng haw a, a tichhuak palh ta hlauh a ni.

Balloon bawr hi van sanga a thlawh hnuah a bo zui ngeiin an ring a, ngaihtuah pawh an ngaihtuah zui lem lo va; mahse, ni rei vak lo hnuah Cleveland, Tennessee-a cheng pakhat, Todd Huyler chuan an kawt vel hnim a tihfai laiin an pala balloon bawr tang hi a hmu leh ta a ni.

Balloon a’n lak chuan lehkhaip a lo awm tel a, hetah hian an leina hmun hming lo inziak te leh sikul hmingte pawh a lo awm a ni.

Thing mistiri, Huyler-a hian Johnson-a leh an zirtirtu chu ama chher thil eng eng emaw a thawn let ta a, heng zingah hian baseball bat pawh a tel a. Huyler-a hian a thil thawnah hian ama leh a ui, Henry nena thla an lak dun bakah Johnson-a hnenah hian $100 leh a nu leh pate lehkha tur a thawn bawk.

Mountain Grove Elementary School hian an zirlai chunga thil thleng chu ‘thawnthu ropui tak’ tiin an Facebook page-ah an dah chhuak a, Huyler-a thiltih chu tha an ti tak zet tih an tar lang.