Movie inzawm chho zela siam (franchise), hlawhtling pawl tak ni bawk, ‘Scream’ siam thar ber thehlarna tura chet chhuahna chuan California, United States-ah chuan mi tam tak timangangin thuneitute hnena puih dilna number, 911 hmetin an ko chuah chuah mai.

Movie thehlar nan hian a film-a tualthattu, ‘Ghostface’ anga inchei an hmuh chuan 911 hi an be ta thin a, police chuan movie thehlarna atana tih mai a nih thu an hrilh zel a ngai a ni.

Sonoma Police Department chuan Sonoma Plazabul kawtthler kila a film-a langsar tak tualthattu anga inchei hmutute chuan Thawhtanni khan 911 hi vawi tam tak an call tih an sawi.

“He pa hi biakpawh niin company-in Paramount kaltlanga Scream movie thar thehlarna tura an rawih a ni,” tiin department chuan Facebook-ah an tar lang a ni.

Series-a a thar ber tur, ‘Scream VI’ hi March 10-a tlangzarh tura ruahman a ni.

Sonoma hi he franchise nen hian inzawmna thuk tak a nei kher a. Kum 1996 Scream movie chhuak hmasa ber kha Sonoma County chhunga thil thleng anga chan niin a film-ah hian Sonoma Square bul vel pawh a lang nual a ni.