Ngaihzawng neih theih nana heti zat insen hi chu pui ve tak a ni!

Georgia, United States-a cheng, pa te ve tak, kum 27 mi, Dynzell Sigers-a chuan a pa tawi em avanga nulain a hnawl fo avangin intihsanna turin a ke lam zaiin a zawm a, hemi atan hian $81,000 (Rs 66,44,106) zet a seng ta a. A hmaa feet 5’5 chauh kha tunah chuan feet ruk a ni ta.

“Ka nunah hian ka pa tet avangin ka buai em em reng thin a ni,” tiin The New York Post hnenah email-in a hrilh.

“Pianphung inthlak turin bawp hi a tihsen theih tih ka hre ta a, chu chuan ka nunkhua zawng zawng hi a thlak thei dawn niin ka ngai a ni,” a ti.

Rawlthar a nih tirhin a nula ngaihzawn em emin ‘a tawi lutuk avang leh a la naupan avangin a hnawl’ niin NeedToKnow.co.uk hnenah a hrilh bawk.

“Nula ka ngaihmelh hmain ka san zawng ka tihpun phawt a ngai tih ka inhria a, ka tetna hian remchang tam tak ka hloh phah tawh a ni,” tiin Atlanta-a cheng hian a sawi.

NY Post-in an tar lan dan chuan Sigers-a hian a san belh theihna tur kawng tam tak dapin a hmang thin a; mahse, chung chuan a beisei ang a pe lo zel.

A taksa tisei turin inzai a ngai tih a hre ta a, Sigers-a hian a bak duhthlan tur a neih loh avangin inzai turin thu a titlu ta nghal vat niin a tar lang.

“Tumah entawn pawh ka nei lo va; mahse, ka taksa leh rilru hi siam that leh ka duh a ni,” tiin US Navy-a damdawi lama thawk thin hian a sawi.

“Hei hi ka san zawng belhna leh ka pian min thlak danglam theitu chu a ni ta a ni,” a ti.