Thil danglam duh hrim hrim hi awm a ni a, Japan-a wrestling huaihawttute pawh hian danglam an tum khawp mai a, rel chak chi (bullet train) tlan laiah, mite thut khat vek kara kalna kar awl (aisle)-ah wrestling match an huaihawt a, a hlawhtling hle nghe nghe.

DDT Pro-Wrestling-in an huaihawtah hian an inbuanna rel pindanah hian thutna 75 chauh a awm a, darkar chanve inbuan tura enna tur ticket hi darkar chanve pawh tling mang lovah an hralh zo nghal vek niin Japan News chanchinbu chuan a tar lang.

Tokyo leh Nagoya inkara darkar khata mel 180 zeta chaka tlan, Shinkansen bullet train-a inbuante hi Minoru Suzuki leh Sanshiro Takagi an ni a, Thawhtanni kal taa an huaihawt kha a ni.

Wrestler pahnih hian hruihrual chhunga an inbeih dan pangngai ang vekin an ti a, entuten an lawmin thla an la nasa a, thehdarh pawh a hlawh hle bawk.

DDT hian inbuan nan hrim hrim hian he rel pindan hi a vaiin an hauh vek a ni.

A huaihawttute hian hmun awm ang lo tak taka hetiang buatsaih hi an hrat hrim hrim a, a hma pawhin lehkhawbu dawrah leh camp-na hmunah te an lo huaihawt tawh.

Rela an huaihawtah hian Suzuki a chak zawk a ni.